1 સપ્ટેમ્બર 2025:  અફઘાનિસ્તાનના પૂર્વ ભાગમાં ૬.૦ની તીવ્રતાના શક્તિશાળી ભૂકંપે ભારે તબાહી મચાવી છે. આ દુર્ઘટનામાં થયેલા જાન-માલના નુકસાન પર વડાપ્રધાન નરેન્દ્ર મોદીએ ઊંડો શોક વ્યક્ત કર્યો છે. તેમણે સોશિયલ મીડિયા પ્લેટફોર્મ 'X' પર એક પોસ્ટમાં અસરગ્રસ્ત પરિવારો પ્રત્યે સંવેદના વ્યક્ત કરી અને ભારત તરફથી તમામ શક્ય માનવતાવાદી મદદનું આશ્વાસન આપ્યું.
 
પીએમ મોદીની સંવેદના
વડાપ્રધાન મોદીએ ટ્વીટમાં જણાવ્યું, "અફઘાનિસ્તાનમાં ભૂકંપને કારણે થયેલા જાન-માલના નુકસાનથી હું ખૂબ જ દુઃખી છું. આ મુશ્કેલ સમયમાં અમારી સંવેદના અને પ્રાર્થના શોકગ્રસ્ત પરિવારો સાથે છે. અમે ઘાયલોના ઝડપી સ્વસ્થ થવાની કામના કરીએ છીએ. ભારત અસરગ્રસ્ત લોકોને તમામ શક્ય માનવતાવાદી સહાય અને રાહત પૂરી પાડવા માટે તૈયાર છે."

ભૂકંપથી ભારે વિનાશ
આ ભૂકંપનો સૌથી વધુ પ્રભાવ કુનાર અને નંગરહાર પ્રાંતમાં જોવા મળ્યો હતો, જ્યાં મોટી સંખ્યામાં ઘરો ધરાશાયી થયા છે. તાલિબાન વહીવટીતંત્રના ગૃહ મંત્રાલયના પ્રવક્તા અબ્દુલ મતીન કાનીએ જણાવ્યું કે, મૃત્યુઆંક અને ઘાયલોની સંખ્યા હજુ વધી શકે છે. બચાવ અને રાહત ટીમો યુદ્ધના ધોરણે કાર્ય કરી રહી છે. દૂરના પહાડી વિસ્તારોમાં પણ સહાય મોકલવામાં આવી છે અને હેલિકોપ્ટરની મદદથી ગંભીર રીતે ઘાયલ લોકોને હોસ્પિટલ પહોંચાડવામાં આવી રહ્યા છે.

આ ભૂકંપ જૂન ૨૦૨૨ બાદ અફઘાનિસ્તાનમાં આવેલો સૌથી ભયાનક ભૂકંપ માનવામાં આવે છે, જેણે પહેલાથી જ માનવતાવાદી કટોકટી અને મર્યાદિત સંસાધનોનો સામનો કરી રહેલા અફઘાનિસ્તાન માટે સ્થિતિ વધુ કપરી બનાવી દીધી છે.