બિહારમાં રાજકીય ગરમાવો વધી રહ્યો છે, કારણ કે ભૂતપૂર્વ નાયબ મુખ્યમંત્રી અને RJD નેતા તેજસ્વી યાદવે મુખ્યમંત્રી નીતિશ કુમાર અને કેન્દ્રની ભાજપ સરકાર પર આકરા પ્રહારો કર્યા છે. કોંગ્રેસની 'મતદાર અધિકાર યાત્રા'ના સમાપન સમારોહમાં બોલતા તેજસ્વીએ નીતિશ કુમારને 'ભ્રષ્ટાચારના ભીષ્મ પિતામહ' કહીને સંબોધ્યા હતા. 
તેજસ્વી યાદવે આરોપ લગાવ્યો કે બિહારમાં ભ્રષ્ટાચાર ચરમસીમાએ છે અને મુખ્યમંત્રી આ કૌભાંડો પર મૌન સેવી રહ્યા છે. તેમણે તાજેતરમાં રાજ્યના એન્જિનિયરો પાસેથી ૧૦૦ કરોડ રૂપિયા રોકડા મળ્યા હોવાનો ઉલ્લેખ કરીને કહ્યું કે જે લોકોએ ભ્રષ્ટાચાર પર બોલવું જોઈએ, તેઓ પોતે ભ્રષ્ટાચારના ભીષ્મ પિતામહ બની ગયા છે. તેમણે દાવો કર્યો કે નીતિશ કુમાર હવે 'હોશમાં' નથી અને તેમની પાસે બિહાર માટે કોઈ વિઝન નથી.
તેજસ્વી યાદવે વડાપ્રધાન મોદી અને ગૃહમંત્રી અમિત શાહ પર પણ પ્રહાર કર્યા. તેમણે આરોપ લગાવ્યો કે મતદાર યાદી સુધારણા (SIR) દરમિયાન ચૂંટણી પંચની મદદથી લાખો નામો કાઢી નાખવામાં આવ્યા હતા, જે દર્શાવે છે કે ભાજપ લોકશાહીને નબળી પાડવા માગે છે. તેમણે વડાપ્રધાનને 'જૂઠાણાની ફેક્ટરી' ગણાવ્યા અને કહ્યું કે બિહારની જનતા આગામી ચૂંટણીઓમાં તેમને પાઠ ભણાવશે.
તેજસ્વીએ નીતિશ કુમાર પર તેમની વિકાસ યોજનાઓની નકલ કરવાનો પણ આરોપ લગાવ્યો અને કહ્યું કે હવે બિહારને 'ડુપ્લિકેટ નહીં, પણ અસલી મુખ્યમંત્રીની જરૂર છે'. તેમણે લોકોને લોકશાહી બચાવવા માટે પોતાના મતનો યોગ્ય ઉપયોગ કરવાની અપીલ કરી