નવી દિલ્હી,: ભારતમાં ડિજિટલ ક્રાંતિની ગતિ હવે રોકેટની જેમ આગળ વધી રહી છે. મોબાઈલ ફોન પર બેંકિંગથી લઈને સરકારી યોજનાઓના લાભ મેળવવા સુધી, આધાર હવે દેશના કરોડો નાગરિકો માટે ડિજિટલ ઓળખનો પર્યાય બની ગયો છે.

તાજેતરમાં, યુનિક આઈડેન્ટિફિકેશન ઓથોરિટી ઓફ ઈન્ડિયા (UIDAI) દ્વારા ઓગસ્ટ મહિના માટે જારી કરાયેલા આંકડા ચોંકાવનારા છે. માત્ર એક જ મહિનામાં, આધાર દ્વારા 221 કરોડથી વધુ પ્રમાણીકરણ વ્યવહારો નોંધાયા છે, જે ભારતના ડિજિટલ અર્થતંત્રના અભૂતપૂર્વ વિકાસને દર્શાવે છે. આનો અર્થ એ થયો કે એક દિવસમાં સરેરાશ 7.12 કરોડથી વધુ વ્યવહારો થયા છે!
 
AI-આધારિત ફેસ પ્રમાણીકરણનો વધતો ઉપયોગ
આ ઝડપી ગતિ પાછળ માત્ર ફિંગરપ્રિન્ટ કે OTP આધારિત પ્રમાણીકરણ જ નથી, પરંતુ નવી ટેકનોલોજીનો ઉપયોગ પણ છે. આ રિપોર્ટમાં એક ખાસ બાબત એ પણ સામે આવી છે કે ઓગસ્ટમાં 18.6 કરોડ ફેસ પ્રમાણીકરણ વ્યવહારો પૂર્ણ થયા હતા. આ આર્ટિફિશિયલ ઇન્ટેલિજન્સ (AI) આધારિત ટેકનોલોજી યુઝર્સને માત્ર તેમના ચહેરાના સ્કેન દ્વારા તેમની ઓળખ ચકાસવાની મંજૂરી આપે છે, જે સુરક્ષા સાથે સરળતા પણ પૂરી પાડે છે.

ઈલેક્ટ્રોનિક્સ અને IT મંત્રાલયે જણાવ્યું કે આધાર-આધારિત પ્રમાણીકરણ હવે સરકારી કલ્યાણકારી યોજનાઓના લાભને અસરકારક રીતે અને સીધા જ લાભાર્થીઓ સુધી પહોંચાડવામાં એક મહત્વપૂર્ણ સાધન તરીકે કામ કરી રહ્યું છે. આ આંકડાઓ દર્શાવે છે કે ભારત હવે ડિજિટલ દુનિયામાં એક નવી ઊંચાઈ સર કરી રહ્યું છે.