નવી દિલ્હી :કેન્દ્રીય મંત્રી સી.આર. પાટીલે GST પરિષદે લીધેલા રાહતના નિર્ણયને આવકાર્યો છે. તેમના મતે, GSTમાં નવા સુધારાઓથી વેપારીઓને વધુ રાહત મળશે અને ભારતીય અર્થતંત્ર વધુ મજબૂત બનશે. આ નિર્ણય દેશના વિકાસ માટે એક સકારાત્મક પગલું છે. તેમણે કહ્યું કે, જીએસટી લાગુ થવાથી દેશમાં "એક દેશ, એક ટેક્સ"ની વ્યવસ્થા અમલમાં આવી છે, જેનાથી ભારતીય અર્થતંત્રને મોટો ફાયદો થયો છે. આ નિર્ણયથી વેપાર-ધંધા સરળ બન્યા છે અને વેપારીઓને જુદા-જુદા ટેક્સની જટિલતામાંથી મુક્તિ મળી છે. 

કેન્દ્રીય મંત્રી સી.આર. પાટીલે તાજેતરમાં GST ના સુધારાઓ અને તેની સફળતા અંગે મહત્ત્વપૂર્ણ નિવેદન આપ્યું છે. તેમણે જણાવ્યું કે, 2017 પહેલા દેશમાં જુદી જુદી કર વ્યવસ્થાઓ હતી, જેમાં જુદા જુદા રાજ્યોમાં જુદા જુદા ટેક્સ લાગુ પડતા હતા. પરંતુ, GST લાગુ થયા બાદ આ તમામ ટેક્સ નાબૂદ થયા છે અને સમગ્ર દેશમાં એક સરખો કર લાગુ થયો છે. આ નિર્ણયથી ઉદ્યોગો વધુ સ્પર્ધાત્મક બન્યા છે અને તેનાથી ભારતીય અર્થતંત્ર પર લોકોનો વિશ્વાસ વધ્યો છે. તેમણે કહ્યું કે, કર વસૂલાતમાં થયેલો વધારો પણ આ જ વિશ્વાસનું પ્રતીક છે. આ સિવાય, PM નરેન્દ્ર મોદીએ જરૂર પડ્યે મક્કમતાપૂર્વક પગલાં લીધા છે.

સી.આર.પાટીલે જણાવ્યું હતું કે, GSTથી માત્ર ઉદ્યોગોને જ નહીં, પરંતુ સામાન્ય નાગરિકોને પણ સીધો ફાયદો થયો છે. તેમણે ઉદાહરણ આપતા જણાવ્યું કે, ટેક્સટાઈલ પરનો કર 12 ટકાથી ઘટાડીને 5 ટકા કરવામાં આવ્યો છે. આ ઉપરાંત, અનાજ, દવાઓ, દૂધ અને દહીં જેવી અત્યંત જરૂરી ચીજવસ્તુઓ પરનો કર કાં તો ઘટાડી દેવામાં આવ્યો છે અથવા તો શૂન્ય કરી દેવામાં આવ્યો છે. વીમા પરથી પણ ટેક્સ ઘટાડવામાં આવતા લોકોને મોટી રાહત મળી છે. આ પગલાંથી સ્થાનિક ઉત્પાદન અને નિકાસમાં વધારો થવાની સંભાવના છે અને વેપારીઓને ગુણવત્તા સાથે ઉત્પાદન વધારવા માટે પ્રોત્સાહન મળશે.

GST સુધારા ઉપરાંત, સી.આર. પાટીલે અન્ય ક્ષેત્રોમાં પણ થઈ રહેલા વિકાસ કાર્યો વિશે વાત કરી. તેમણે જણાવ્યું કે, દેશના 33 રાજ્યોમાં વોટર હાર્વેસ્ટિંગ સ્ટ્રક્ચર્સ ઊભા કરવામાં આવ્યા છે, જે પાણીના સંરક્ષણ માટે એક મહત્ત્વપૂર્ણ પગલું છે. આ ઉપરાંત, તેમણે સુરત એરપોર્ટને લગતી સમસ્યાનો પણ ઉલ્લેખ કર્યો. તેમણે કહ્યું કે, 'ઉડાન સેવા' અંતર્ગત એવિએશન મિનિસ્ટ્રીમાં રજૂઆત કરવામાં આવી છે, જેથી હવે સુરત એરપોર્ટની બહાર ઊભી રહેતી રિક્ષાઓને એરપોર્ટની અંદર જવાની મંજૂરી મળશે. આ તમામ પગલાં દેશના આર્થિક અને સામાજિક વિકાસને વેગ આપવા માટે લેવામાં આવ્યા છે.