હૈદરાબાદ : ગણેશ ઉત્સવની સમાપ્તિ સાથે, બાલાપુરના પ્રસિદ્ધ લાડુએ ફરી એકવાર ઇતિહાસ રચ્યો છે. ત્રણ દાયકા જૂની પરંપરા મુજબ યોજાયેલી લાડુની હરાજીમાં, ૨૧ કિલો વજનનો પ્રસાદ ૩૫ લાખ રૂપિયાની અધધ કિંમતમાં વેચાયો, જેણે ગયા વર્ષના રેકોર્ડને તોડી નાખ્યો. આ લાડુને સોનાના મુગટથી સજાવવામાં આવ્યો હતો.

બોલીના વિજેતા કોણ?
આ ઐતિહાસિક હરાજીમાં, કર્મનઘાટના રહેવાસી લિંગલા દશરથ ગૌડે સૌથી વધુ બોલી લગાવીને આ લાડુ પોતાના નામે કર્યો. આ પ્રસંગે બાલાપુરની ગલીઓ ભક્તો અને દર્શકોથી ઉભરાઈ ગઈ હતી, જેઓ આ ઉત્સાહપૂર્ણ ક્ષણના સાક્ષી બનવા માટે મોટી સંખ્યામાં ઉપસ્થિત રહ્યા હતા.

ઉત્સવનું વાતાવરણ
આખો બાલાપુર વિસ્તાર કેસરી અને સફેદ રંગોથી સજાવવામાં આવ્યો હતો. સવારથી જ ભક્તોનું ઘોડાપૂર ઉમટી પડ્યું હતું. મુખ્ય મંડપ પાસે ૧૮ ફૂટ ઊંચી ગણેશ મૂર્તિના વિસર્જન માટે પણ તડામાર તૈયારીઓ કરવામાં આવી હતી. આ લાડુ વિશે એવી માન્યતા છે કે તેનું સેવન કરવાથી રોગો દૂર થાય છે અને ઘરમાં સુખ-શાંતિ આવે છે.

આ રેકોર્ડબ્રેક હરાજીએ ફરી એકવાર સાબિત કર્યું કે લોકોની ધાર્મિક આસ્થા અને શ્રદ્ધા કેટલી પ્રબળ છે, અને બાલાપુર ગણેશ લાડુની પરંપરા આગામી વર્ષોમાં પણ ચાલુ રહેશે.