મેરઠ : ઉત્તર પ્રદેશના મેરઠમાં આવેલી અબ્દુલ્લા કોલોની પર મોટો વિવાદ ઊભો થયો છે. આ કોલોનીમાં હિન્દુઓને પ્લોટ વેચવા પર પ્રતિબંધ હોવાના આરોપ બાદ મામલો વકર્યો છે. આ અંગે રાજ્ય સરકારના ઊર્જા રાજ્યમંત્રી સોમેન્દ્ર તોમરે ઉચ્ચ સ્તરીય તપાસની માંગ કરી છે અને જો ખામીઓ મળશે તો બુલડોઝર ચલાવવાની પણ ચેતવણી આપી છે.

શું છે આખો મામલો?

• મેરઠના દક્ષિણ વિધાનસભા વિસ્તારના હાપુર રોડ પર છેલ્લા ૧૦ વર્ષથી અબ્દુલ્લા કોલોની વિકસાવવામાં આવી રહી છે.

• કોલોની પર ધર્મના આધારે ભેદભાવ કરવાનો આરોપ છે. એવું કહેવાય છે કે અહીં હિન્દુઓને પ્લોટ ખરીદવા દેવામાં આવતા નથી.

• કોલોનીની જમીન એક ગેંગસ્ટરના પરિવારની હોવાનું પણ કહેવાય છે, અને કોલોનીનું નામ તેના પુત્રના નામ પરથી રાખવામાં આવ્યું છે.

• મંત્રી તોમરે જણાવ્યું કે કોલોનીમાં નકશા વિના એક મસ્જિદ પણ બનાવવામાં આવી છે, જેની તપાસ થવી જોઈએ.

સરકારનું સખત વલણ
ઉર્જા રાજ્યમંત્રી સોમેન્દ્ર તોમરે મેરઠના ડીએમ ડો. વીકે સિંહને પત્ર લખીને કોલોનીના નકશા અને બાંધકામની તપાસની માંગ કરી છે. તેમણે કહ્યું કે અગાઉની સરકારોમાં આવા ગુંડાઓ અને અપરાધિક પ્રવૃત્તિ ધરાવતા લોકોને રક્ષણ મળતું હતું, પરંતુ હવે યોગી સરકારમાં તેમના માટે કોઈ સ્થાન નથી. જો તપાસમાં ધર્મના આધારે ભેદભાવ સાબિત થશે, તો કડક કાર્યવાહી કરવામાં આવશે અને ગેરકાયદેસર બાંધકામો પર બુલડોઝર પણ ચલાવવામાં આવશે.