નવી દિલ્હી : રશિયન વૈજ્ઞાનિકોની એક ટીમે કેન્સરની રસી બનાવી છે. તેમણે દાવો કર્યો છે કે આ રસીએ તમામ ટ્રાયલ સફળતાપૂર્વક પૂર્ણ કરી લીધા છે અને હવે તે ઉપયોગ માટે સંપૂર્ણપણે તૈયાર છે. રશિયાએ કેન્સર સામેની લડાઈમાં એક નવી સફળતા મેળવી છે. ત્યાંની ફેડરલ મેડિકલ એન્ડ બાયોલોજિકલ એજન્સી (FMBA) એ કેન્સરની રસી વિકસાવી છે. FMBD ના વડા વેરોનિકા સ્કવોર્ટ્સોવાએ જણાવ્યું હતું કે રશિયન એન્ટરમિક્સ કેન્સર રસી હવે ઉપયોગ માટે તૈયાર છે. આ mRNA-આધારિત રસીએ તેની સલામતી અને અસરકારકતા સાબિત કરીને તમામ પ્રીક્લિનિકલ પરીક્ષણો સફળતાપૂર્વક પાસ કર્યા છે. આ રસીનું પ્રારંભિક લક્ષ્ય કોલોરેક્ટલ કેન્સર (કોલોન કેન્સર) હશે.

સ્કવોર્ટ્સોવાએ કહ્યું, 'આ સંશોધન ઘણા વર્ષો સુધી ચાલ્યું, જેમાંથી છેલ્લા ત્રણ વર્ષ ફક્ત ફરજિયાત પ્રીક્લિનિકલ અભ્યાસો માટે સમર્પિત હતા. રસી હવે ઉપયોગ માટે તૈયાર છે. અમે સત્તાવાર મંજૂરીની રાહ જોઈ રહ્યા છીએ.'

તેમણે કહ્યું કે પ્રીક્લિનિકલ પરીક્ષણો રસીની સલામતી, વારંવાર ઉપયોગ છતાં તેની અસરકારકતાની પુષ્ટિ કરે છે. આ સમયગાળા દરમિયાન સંશોધકોએ ગાંઠના કદમાં ઘટાડો અને ગાંઠના વિકાસમાં ઘટાડો જોયો. આ ઉપરાંત, અભ્યાસોએ રસીને કારણે દર્દીઓના જીવિત રહેવાના દરમાં વધારો દર્શાવ્યો હતો.

આ રસીનું પ્રારંભિક લક્ષ્ય કોલોરેક્ટલ કેન્સર હશે. આ ઉપરાંત, ગ્લિઓબ્લાસ્ટોમા (મગજનું કેન્સર) અને ઓક્યુલર મેલાનોમા (આંખના કેન્સરનો એક પ્રકાર) સહિત ચોક્કસ પ્રકારના મેલાનોમા માટે રસીઓ વિકસાવવામાં આશાસ્પદ પ્રગતિ થઈ છે, જે હાલમાં તેમના અદ્યતન તબક્કામાં છે.

10મું પૂર્વીય આર્થિક મંચ 3 થી 6 સપ્ટેમ્બર દરમિયાન વ્લાદિવોસ્તોકમાં 'ધ ફાર ઇસ્ટ: કોઓપરેશન ફોર પીસ એન્ડ પ્રોસ્પેરિટી' થીમ પર યોજાયું હતું. આ મંચમાં 75 થી વધુ દેશો અને પ્રદેશોના 8,400 થી વધુ લોકોએ ભાગ લીધો હતો.