વડાપ્રધાન નરેન્દ્રભાઈ મોદીએ ભાજપ સાંસદો માટે યોજાયેલી એક વર્કશોપમાં ભાગ લઈને મહત્વના નિર્દેશો આપ્યા હતા. જેમાં ટિફિન મીટિંગ, સ્વચ્છતા અભિયાન, GST સુધારાઓ, અને ઓનલાઇન ગેમિંગ સામે જાગૃતિ ફેલાવવા જેવા મુદ્દાઓ પર ભાર મૂકવામાં આવ્યો છે. આ વર્કશોપમાં પીએમ મોદીએ સાંસદોને લોકો સાથે સીધો સંવાદ, નવીન વિચારસરણી, અને સરકારી યોજનાઓના અમલીકરણ પર ધ્યાન આપવા જણાવ્યું છે. વર્કશોપ દરમિયાન GST 2.0ની સફળતાની પ્રશંસા કરવામાં આવી અને તેના ફાયદાઓ લોકો સુધી પહોંચાડવા એક રાષ્ટ્રવ્યાપી અભિયાન શરૂ કરવાનો પ્રસ્તાવ પણ પસાર કરવામાં આવ્યો છે.

સંસદ ભવનમાં યોજાયેલી આ વર્કશોપમાં PM મોદીએ સાંસદોને લોકોની સમસ્યાઓ સાંભળવા અને સરકારી યોજનાઓના લાભો યોગ્ય લોકો સુધી પહોંચે તેની ખાતરી કરવા પર ભાર મૂક્યો હતો.

1. ટિફિન મીટિંગ : સાંસદોએ તેમના સંસદીય ક્ષેત્રની દરેક વિધાનસભામાં દર મહિને એકવાર ટિફિન મીટિંગ યોજવી જોઈએ. આ મીટિંગમાં સામાન્ય લોકો સાથે બેસીને તેમની સમસ્યાઓ સાંભળવી અને તેના ઉકેલ માટે પગલાં લેવાનો હેતુ છે. આનાથી લોકો સાથે સીધો સંવાદ સ્થપાશે અને સરકાર પ્રત્યે વિશ્વાસ વધશે.

2. સ્વચ્છતા અભિયાન : PM મોદીએ સિંગાપોરનું ઉદાહરણ આપીને સ્વચ્છતા અભિયાનને વેગ આપવા જણાવ્યું. તેમણે કહ્યું કે, "સ્વચ્છતા નાણાંથી નહીં, પણ સામૂહિક પ્રયાસોથી સફળ થાય છે." ગ્રામીણ અને શહેરી વિસ્તારોની સમસ્યાઓને અલગ-અલગ રીતે સમજીને તેના ઉકેલ લાવવા પર ભાર મૂકવામાં આવ્યો.

3. નવીન વિચારસરણી : સાંસદોએ ઇનોવેટિવ વિચારો અપનાવીને નવા ઉકેલો શોધવા જોઈએ. મોદીએ કહ્યું, "નવું વિચારો અને કરો, તો જ આપણે આગળ વધી શકીશું."

4. GST સુધારા અભિયાન : GST 2.0ની સફળતાની પ્રશંસા કરતાં મોદીએ સાંસદોને તેના ફાયદાઓ, જેમ કે 7 દિવસમાં રિફંડ, 3 દિવસમાં સરળ રજિસ્ટ્રેશન અને સિમેન્ટ, ટાઇલ્સ જેવી વસ્તુઓ પર ઘટાડેલા ટેક્સ રેટ, લોકો સુધી પહોંચાડવા માટે રાષ્ટ્રવ્યાપી અભિયાન ચલાવવા જણાવ્યું.

5. ઓનલાઇન ગેમિંગ જાગૃતિ : ગ્રામીણ વિસ્તારોમાં ઓનલાઇન ગેમિંગની સમસ્યાઓ વિશે જાગૃતિ ફેલાવવા અને પરિવારોને તેની નાણાકીય અને સામાજિક અસરથી બચાવવા માટે સાંસદોને સૂચના આપવામાં આવી.

6. સરકારી યોજનાઓનું મોનિટરિંગ : સાંસદોએ સરકારી યોજનાઓના લાભાર્થીઓ પર નજર રાખવી અને ખાતરી કરવી કે લાભ યોગ્ય લોકો સુધી પહોંચે. આ ઉપરાંત, કોર્પોરેટ એજન્ડાને પ્રોત્સાહન આપવા કે પક્ષપાતી પ્રશ્નો ટાળવા પણ જણાવવામાં આવ્યું.

7. અધિકારીઓ સાથે વ્યવહાર : સાંસદોએ સંસદીય સમિતિની બેઠકો પહેલા અને પછી સંબંધિત મંત્રીઓ અને અધિકારીઓ સાથે મુલાકાત કરીને વિષયોની ઊંડી માહિતી મેળવવી અને અધિકારીઓ સાથે હંમેશા નમ્ર વ્યવહાર કરવો.

કેન્દ્રીય સંસદીય કાર્ય મંત્રી કિરેન રિજિજુએ જણાવ્યું કે, BJPના સહયોગી દળોના સાંસદો 8 સપ્ટેમ્બરે યોજાનારી બેઠકમાં ભાગ લેશે, જેમાં PM મોદી સત્તાધારી ગઠબંધનના તમામ સભ્યોને સંબોધન કરશે. આ બેઠકમાં 9 સપ્ટેમ્બરના રોજ યોજાનારા ઉપરાષ્ટ્રપતિ ચૂંટણીની તૈયારી માટે મોક પોલિંગનો અભ્યાસ પણ કરવામાં આવશે.

પીએમ મોદીના નિર્દેશોને અનુસરીને BJP સાંસદો દેશભરમાં ટિફિન મીટિંગ યોજીને લોકોની સમસ્યાઓ સાંભળશે અને GST સુધારાઓના ફાયદાઓનો પ્રચાર કરશે. સ્વચ્છતા અભિયાનને વેગ આપવા અને ઓનલાઇન ગેમિંગની સમસ્યાઓ સામે જાગૃતિ ફેલાવવા માટે સ્થાનિક સ્તરે કામગીરી આગામી ટૂંક સમયમાં શરૂ થઈ શકે છે. 8 સપ્ટેમ્બરની બેઠકમાં સહયોગી દળોના સાંસદો સાથે ઉપરાષ્ટ્રપતિ ચૂંટણીની તૈયારીઓ પર ચર્ચા થશે. આ વર્કશોપ સાંસદોને લોકો સાથે વધુ સંનાદ સ્થાપવા અને સરકારની નીતિઓને અસરકારક રીતે અમલમાં મૂકવા માટે માર્ગદર્શન આપશે.