કટિહાર, તા.૮:  બિહારના કટિહારમાં કોંગ્રેસના સાંસદ તારિક અનવરનો એક વીડિયો ઝડપથી વાયરલ થઈ રહ્યો છે, જેના કારણે રાજકીય વર્તુળોમાં એક નવી ચર્ચા શરૂ થઈ છે. આ વીડિયોમાં સાંસદ તારિક અનવર પૂરગ્રસ્‍ત વિસ્‍તારોનું નિરીક્ષણ કરવા માટે લોકોના ખભા પર સવાર થઈને પાણી પાર કરતા જોવા મળી રહ્યા છે. વિરોધ પક્ષો આ ઘટનાને ‘જનતાનું અપમાન' ગણાવી રહ્યા છે, જ્‍યારે કોંગ્રેસ તેને ‘જનતાનો પ્રેમ' ગણાવી રહી છે.

સાંસદ તારિક અનવર તેમના બે દિવસના પ્રવાસમાં મણિહારી વિધાનસભાના કટિહાર, બરારી અને ધુરિયાહી પંચાયતના પૂરગ્રસ્‍ત વિસ્‍તારોમાં પહોંચ્‍યા હતા. શરૂઆતમાં, તેમણે ટ્રેક્‍ટર દ્વારા દૂરના વિસ્‍તારોનો સર્વે કર્યો. પરંતુ જ્‍યારે તેમને પાણી ભરેલા વિસ્‍તારોમાંથી પગપાળા પસાર થવું પડ્‍યું, ત્‍યારે તેઓ પોતે ચાલવાને બદલે સ્‍થાનિક લોકોના ખભા પર બેસી ગયા. આ ઘટનાનો વીડિયો સોશિયલ મીડિયા પર આવ્‍યા બાદ, તેની ટીકા થવા લાગી છે.

કટિહાર જિલ્લા કોંગ્રેસના પ્રમુખ સુનીલ યાદવે સાંસદનો બચાવ કરતા કહ્યું કે, સાંસદ તારિક અનવર પૂરગ્રસ્‍તોની સમસ્‍યાઓ સમજવા માટે દૂરના વિસ્‍તારોમાં ગયા હતા. પાણીમાં ચાલતી વખતે તેમની તબિયત બગડી ગઈ હતી, જેના કારણે તેઓ યોગ્‍ય રીતે ચાલી શકતા ન હતા. લોકોએ પોતે જ તેમને પ્રેમથી પોતાના ખભા પર ઉંચકીને તેમની તપાસ કરાવી. આ જનતાનો તેમના પ્રત્‍યેનો પ્રેમ અને આદર દર્શાવે છે.

જોકે, વિપક્ષી પક્ષો કોંગ્રેસના આ દલીલ સાથે સહમત નથી. તેમનું કહેવું છે કે આ એક જનપ્રતિનિધિનો ઘમંડ દર્શાવે છે. સ્‍થાનિક ભાજપના એક નેતાએ કહ્યું, આ જનતાની સમસ્‍યાઓ જોવાની રીત નથી, પરંતુ તેમની મજાક ઉડાવવાની રીત છે. જો સાંસદ યોગ્‍ય રીતે ચાલી શકતા ન હતા, તો તેમણે મોટર બોટનો ઉપયોગ કરવો જોઈતો હતો. જનતાના ખભાનો ઉપયોગ કરવો એ સંપૂર્ણપણે રાજકીય સ્‍ટંટ છે.

આ ઘટનાએ નેતાઓ દ્વારા પૂરગ્રસ્‍ત વિસ્‍તારોની મુલાકાત લેવાની પદ્ધતિઓ પર પણ પ્રશ્‍નો ઉભા કર્યા છે. આ તસવીર હવે રાજકીય ચર્ચાનો વિષય બની ગઈ છે અને તેના પર સોશિયલ મીડિયા પર તીવ્ર પ્રતિક્રિયાઓ આવી રહી છે. આવનારા દિવસોમાં આ મુદ્દો કેટલો વકરે છે તે જોવું રસપ્રદ રહેશે.