૦૮ સપ્ટેમ્બર, ૨૦૨૫: એક તરફ, યુક્રેનિયન રાષ્ટ્રપતિ વોલોડીમીર ઝેલેન્સકી ભારતીય વડાપ્રધાન નરેન્દ્ર મોદી સાથે શાંતિ વાટાઘાટો અંગે ફોન પર ચર્ચા કરી રહ્યા છે, અને બીજી તરફ, તેઓએ ભારત વિરુદ્ધ ખુલ્લેઆમ ઝેર ઓક્યું છે. અમેરિકન રાષ્ટ્રપતિ ડોનાલ્ડ ટ્રમ્પની ભારત પર ટેરિફ લાદવાની નીતિને તેમણે સંપૂર્ણપણે યોગ્ય ઠેરવી છે, જેના કારણે બંને દેશો વચ્ચેના સંબંધોમાં તણાવ વધી શકે છે.

તાજેતરમાં શાંઘાઈ કોઓપરેશન ઓર્ગેનાઈઝેશન (SCO) સમિટમાં ભારતના પીએમ મોદી, ચીનના રાષ્ટ્રપતિ શી જિનપિંગ અને રશિયાના રાષ્ટ્રપતિ વ્લાદિમીર પુતિન વચ્ચેની મુલાકાત વૈશ્વિક સ્તરે ચર્ચાનો વિષય બની હતી. આ બેઠક બાદ એક પત્રકારના પ્રશ્નના જવાબમાં ઝેલેન્સકીએ સ્પષ્ટ શબ્દોમાં કહ્યું કે, "રશિયા સાથે વેપાર કરતા દેશો પર ટેરિફ લાદવાનો નિર્ણય બિલકુલ સાચો છે."

આ નિવેદન સીધું ભારતને નિશાન બનાવે છે. ૨૦૨૨માં રશિયા-યુક્રેન યુદ્ધ શરૂ થયા બાદ ભારતનું રશિયા પાસેથી ક્રૂડ ઓઈલની આયાત વધી હતી, જેના કારણે બંને દેશો મોટા ઊર્જા ભાગીદાર બન્યા. અમેરિકાના ભૂતપૂર્વ રાષ્ટ્રપતિ ટ્રમ્પે આ નીતિને વખોડી કાઢી હતી અને ભારતીય માલ પર ટેરિફ ૫૦ ટકા સુધી વધારી દીધો હતો. અત્યાર સુધી શાંત રહેલા ઝેલેન્સકીનું આ નિવેદન ટ્રમ્પની નીતિને જાહેરમાં સમર્થન આપે છે.

જ્યારે ભારત અને રશિયા વચ્ચેના સંબંધો મજબૂત થઈ રહ્યા છે, ત્યારે ઝેલેન્સકીનું આ નિવેદન યુક્રેનની રણનીતિમાં મોટા ફેરફારનો સંકેત આપી રહ્યું છે. જ્યારે અમેરિકા પણ રશિયા સામે ગૌણ પ્રતિબંધો લાદવાની તૈયારી કરી રહ્યું છે, ત્યારે યુક્રેન પણ હવે ભારતને સીધું પડકારી રહ્યું હોય તેવું લાગી રહ્યું છે. આ સમગ્ર ઘટનાક્રમથી વૈશ્વિક રાજકારણમાં નવા સમીકરણો રચાઈ રહ્યા છે.