કાઠમંડુ,તા.૦૯: નેપાળમાં કેપી શર્મા ઓલી સરકારે સોશિયલ મીડિયા પર લાદવામાં આવેલ પ્રતિબંધ હટાવી લીધો. આ પગલું હિંસક અથડામણો પછી લેવામાં આવ્‍યું છે જેમાં ઓછામાં ઓછા ૨૦ પ્રદર્શનકારીઓ મૃત્‍યુ પામ્‍યા અને ૩૦૦ લોકો ઘાયલ થયા હતા. સરકારે સોશિયલ મીડિયા બંધ કરવાના નિર્ણયનો જવાબ આપવા માટે એક નિવેદન બહાર પાડ્‍યું હતું. વડા પ્રધાન ઓલીએ કહ્યું કે આ ઘટનાનું કારણ સરકારના પ્રયાસો અને ઝેડ પેઢી વચ્‍ચે વધતી જતી મૂંઝવણ હતી. તેમણે લોકોને શાંતિ જાળવવા અને વાતચીત દ્વારા ઉકેલ શોધવાની અપીલ કરી. વિરોધીઓ અને વહીવટીતંત્ર વચ્‍ચે તણાવ ઓછો કરવા માટે સુરક્ષા દળોને પણ સતર્ક રહેવાનો આદેશ આપવામાં આવ્‍યો છે.

અગાઉ નેપાળમાં આગ વધુ ભડકી ઉઠી હતી. કાઠમંડુ પોસ્‍ટના અહેવાલ મુજબ, દમકમાં પ્રદર્શનકારીઓએ વડા પ્રધાન કેપી શર્મા ઓલીના ઘર પર પથ્‍થરમારો કર્યો હતો. ગુસ્‍સે ભરાયેલા પ્રદર્શનકારીઓએ ટાયર સળગાવીને પૂર્વ-પશ્ચિમીહાઇવે બ્‍લોક કરી દીધો હતો. પરિસ્‍થિતિ કાબૂ બહાર જતી જોઈને, પોલીસે ચેતવણી તરીકે હવામાં ગોળીબાર કરવો પડ્‍યો હતો. સ્‍થળ પર સેના તૈનાત કરવામાં આવી. સુરક્ષા દળોને જોતાં જ ગોળીબાર કરવાનો આદેશ આપવામાં આવ્‍યો છે. આ દરમિયાન નેપાળના ગૃહમંત્રીએ રાજીનામું આપી દીધું છે. તેમણે કહ્યું કે, તેઓ હિંસામાં માર્યા ગયેલા લોકોની જવાબદારી લઈને પદ છોડવા માંગે છે. નેપાળના વડા પ્રધાન કેપી શર્મા ઓલીએ કેબિનેટ બેઠકમાં સ્‍પષ્ટપણે કહ્યું હતું કે, સોશિયલ મીડિયા પર લાદવામાં આવેલ પ્રતિબંધ હટાવવામાં આવશે નહીં. ભલે આ માટે તેમણે ખુરશી છોડવી પડે. તેમનું કહેવું છે કે, દેશની સુરક્ષા અને વ્‍યવસ્‍થા જાળવવા માટે આ પગલું જરૂરી છે.

નિવેદનમાં ઓલીએ સોશિયલ મીડિયા પ્‍લેટફોર્મને બ્‍લોક કરવાના કારણો પણ આપ્‍યા. તેમનો દાવો છે કે, સરકાર પાસે સોશિયલ મીડિયા પ્‍લેટફોર્મ પર પ્રતિબંધ મૂકવાની કોઈ નીતિ નથી, પરંતુ તેમણે પોતાના નિવેદનમાં સોશિયલ મીડિયા પરથી તાત્‍કાલિક અનબ્‍લોક કરવાની કોઈ જાહેરાત કરી નથી. ઉપરાંત, તેમના મંત્રીએ મીટિંગમાં ઓલીના નિવેદનને ટાંકીને કહ્યું, 'આપણે નોંધણી વિના નેપાળમાં કોઈપણ સોશિયલ મીડિયા પ્‍લેટફોર્મને કેવી રીતે કામ કરવાની મંજૂરી આપી શકીએ? અમે સોશિયલ મીડિયા સાથે સમાધાન કરી શકતા નથી.'

નેપાળ સરકારે ફેસબુક અને એક્‍સ સહિત ૨૬ સોશિયલ મીડિયા સાઇટ્‍સ પર નોંધણી ન કરવા બદલ પ્રતિબંધ મૂકવાનો આદેશ જારી કર્યો હતો. જોકે, મોટી સંખ્‍યામાં યુવાનો સરકાર વિરુદ્ધ રસ્‍તા પર ઉતરી આવ્‍યા હતા. સોમવારે, વિરોધ હિંસક બન્‍યો અને કેટલાક વિરોધીઓ સંસદ પરિસરમાં ઘૂસી ગયા. જે બાદ પ્રદર્શન ઉગ્ર બન્‍યું હતું.(૪૦.૬)