વોશિંગ્‍ટન તા.૯: અમેરિકામાં ઈન્‍ડિયન્‍સની ઈજ્જત ધૂળધાણી કરી દે તેવી વધુ એક ઘટનાનો વિડીયો સામે આવ્‍યો છે, આ વિડીયો સ્‍ટોરમાં ચોરી કરતા પકડાઈ ગયેલી એક ગુજરાતી યુવતીનો છે જેણે પોલીસને જોતા જ શરૂ કરેલી જબરજસ્‍ત એક્‍ટિંગ હાલ સોશિયલ મીડિયા પર ચર્ચાનો વિષય બની રહી છે. વોશિંગ્‍ટન સ્‍ટેટના કેન્‍ટ સિટીમાં અરેસ્‍ટ થયેલી આ યુવતી આમ તો છેક જાન્‍યુઆરી ૧૫ના રોજ ટાર્ગેટના સ્‍ટોરમાં ચોરી કરતા પકડાઈ હતી પરંતુ તેની ધરપકડના બોડીકેમ ફુટેજ હાલમાં જ અમેરિકાની એક યૂટ્‍યૂબ ચેનલ પર પર રિલીઝ કરાયા છે.

પોલીસને જોતા જ પોતે જાણે ડરની મારી ફફડી રહી હોય તેમ આ યુવતી શ્વાસ લેવામાં અને બોલવામાં પણ તકલીફ પડી રહી હોય તેવો ડોળ કરી રહી હતી અને પોલીસે તેને ઉંડા શ્વાસ લેવાનું કહી ઈંગ્‍લિશ આવડે છે કે નહીં તે સવાલ કર્યો હતો. આ યુવતીએ પોતાને ઈંગ્‍લિશ બરાબર ના આવડતું હોવાનું કહી પ્રાઈમરી લેંગ્‍વેજ ગુજરાતી હોવાનું કહેવાની સાથે પોતે ઈન્‍ડિયન હોવાનું કહ્યું હતું.

દસ મિનિટના આ બોડીકેમ ફુટેજમાં જોઈ શકાય છે કે સ્‍ટોરનો સ્‍ટાફ પોલીસને આ યુવતી ચોરી કરીને બહાર નીકળી રહી હતી તે વખતના સીસીટીવી ફુટેજ બતાવે છે અને ત્‍યારબાદ તેને અરેસ્‍ટ કરવા આવેલો પોલીસ ઓફિસર તેને ઈન્‍ટરપ્રિટર જોઈએ છે કે કેમ તે પૂછે છે, જોકે પોલીસને જોતા જ નર્વસ થઈ ગયેલી આ યુવતીને તેની પાસે કોઈ આઈડી છે કે કેમ તે પૂછવામાં આવે છે, જેના જવાબમાં તે પોતાની પાસે વોશિંગ્‍ટનનું ડ્રાઈવર્સ લાઈસન્‍સ હોવાનું જણાવે છે. પોલીસ ઓફિસર તેને એવી પણ ઓફર આપે છે કે જો તે પોતાનું સાચું નામ અને એડ્રેસ જણાવી દેશે તો તેને જેલમાં રાત નહીં કાઢવી પડે.

પોલીસ આ યુવતીની પૂછપરછ કરી રહી હોય છે ત્‍યારે કોઈ સતત તેને ફોન કરી રહ્યું હોય છે, તેની સામે ઉભેલો પોલીસ ઓફિસર કોનો ફોન આવી રહ્યો છે અને તેની સાથે તારે વાત કરવી છે કે નહીં તેવું આ યુવતીને પૂછે છે જેના જવાબમાં આ યુવતી ડરતા-ડરતા ફોન પર વાત નથી કરવી તેવું જણાવે છે. આ યુવતીની સરનેમ પરમાર હોવાનું વિડીયોમાં સાંભળી શકાય છે, અને દસ મિનિટના આ વિડીયોમાં લગભગ ચોથી મિનિટે તે હાથ જોડીને પોલીસ સામે માફી માગતી જોઈ શકાય છે.

પોલીસ ઓફિસર તેને પૂછે છે કે શું તેણે પહેલા આવી કોઈ હરકત કરી છે, અને ફરી આવું કંઈ કરશે? જેના જવાબમાં આ યુવતી રડતા-રડતા ના પાડે છે. ત્‍યારબાદ પોલીસ તેને એમ પૂછે છે કે શું તે ચોરીનો માલ વેચવાની ફિરાકમાં હતી? ત્‍યારે આ યુવતી એવું કહે છે કે પોતે અમુક વસ્‍તુઓ વેચવાની હતી.. પૂછપરછ દરમિયાન તે સતત હાથ જોડીને રડતી રહે છે અને અમેરિકાના એક પુરુષ તેમજ એક મહિલા પોલીસ ઓફિસર તેની પૂછપરછ ચાલુ રાખે છે.

આ દરમિયાન ચોરી કરનારી યુવતીનો ફોન પણ સતત વાગતો રહે છે, અને આ યુવતી તેના પતિને આ અંગે કંઈ જ ના જણાવવા માટે કહે છે. જોકે, છ મિનિટ સુધી આરોપીનું નામ અને એડ્રેસ કન્‍ફર્મ ના થતાં પોલીસ ઓફિસર આ ગુજરાતી મહિલાને એવું કહેતા સાંભળી શકાય છે કે જો આઈડેન્‍ટિટી કન્‍ફર્મ ના થઈ તો તારે જેલમાં જવું પડશે.

જ્‍યારે આ યુવતીને એવું કહેવામાં આવે છે કે ચોરીના આરોપમાં તેને કોર્ટમાં હાજર થવું પડશે ત્‍યારે તે ફરી પોલીસને હાથ જોડીને પોતે કોર્ટમાં નહીં જઈ શકે તેવું જણાવે છે. ત્‍યારબાદ તેને એક પેપર પર સાઈન કરવા માટે કહેવાય છે, આ દરમિયાન મહિલા પોલીસ ઓફિસર તેને કહે છે કે જો તારે ઘરે જવું હોય તો તે જે કર્યું છે તે કહી દે અને તારું આઈડેન્‍ટિફિકેશન કન્‍ફર્મ કરાવી દે.

આ યુવતી તેને જે પેપર અપાયું હોય છે તેમાં સાઈન કરવા માટે પણ આનાકાની કરે છે અને પછી કદાચ તે સાઈન કરી નાખે છે ત્‍યારે પોલીસ તેને વોર્નિંગ આપે છે કે જો હવે તે આ સ્‍ટોરમાં આવશે તો તેની સામે ટ્રેસપાસિંગનો ચાર્જ લગાવાશે. પોલીસની વોર્નિંગ બાદ આ યુવતી જાતે જ સ્‍ટોરની બહાર નીકળવાની તૈયારી બતાવે છે અને તેને રિલીઝ પણ કરી દેવાય છે.(૩૮.૫)