મુંબઈ : ભારતીય ક્રિકેટના સ્ટાર ખેલાડી રોહિત શર્મા સોમવારે મોડી રાત્રે મુંબઈની કોકિલાબેન હોસ્પિટલમાં જોવા મળતા ચાહકોમાં ચિંતાનું મોજું ફરી વળ્યું છે. રોહિત શર્માનો હોસ્પિટલ જતા સમયનો વિડીયો સોશિયલ મીડિયા પર ઝડપથી વાયરલ થઈ રહ્યો છે, જેમાં તે એકદમ કેઝ્યુઅલ લુકમાં જોવા મળી રહ્યો છે. જોકે, આ વિડીયો જોઈને લાગે છે કે ચિંતા કરવા જેવું કંઈ નથી.
 
આરામથી હોસ્પિટલમાં પ્રવેશ
વાયરલ થઈ રહેલા વિડીયોમાં, રોહિત શર્મા સફેદ ટી-શર્ટ, કાળા પાયજામા અને ચપ્પલ પહેરીને જોવા મળી રહ્યો છે. જ્યારે ફોટોગ્રાફરો તેને અટકાવવાનો પ્રયાસ કરે છે, ત્યારે તે થોડા સમય માટે ઊભો રહે છે, પરંતુ કોઈ ઉતાવળમાં હોય તેવું લાગતું નથી. તેના આરામદાયક હાવભાવ સૂચવે છે કે તે કોઈ ગંભીર સ્વાસ્થ્ય સમસ્યાને કારણે હોસ્પિટલમાં ગયો નથી.

તાજેતરમાં જ રોહિતે બેંગલુરુમાં BCCI સેન્ટર ઓફ એક્સેલન્સ ખાતે પોતાનો ફિટનેસ ટેસ્ટ પાસ કર્યો છે. તે ઓક્ટોબરમાં ઓસ્ટ્રેલિયા સામેની વન-ડે શ્રેણીથી આંતરરાષ્ટ્રીય ક્રિકેટમાં પરત ફરશે. રોહિત શર્માએ T20 અને ટેસ્ટ ક્રિકેટમાંથી નિવૃત્તિ લીધી છે અને હવે તે માત્ર વન-ડે ફોર્મેટમાં જ રમશે.
 
રોહિત અને કોહલી વગરનો પ્રથમ એશિયા કપ
રોહિત અને વિરાટ કોહલીની ગેરહાજરીમાં, ભારતીય ટીમ સૂર્યકુમાર યાદવની કેપ્ટનશીપ હેઠળ એશિયા કપ ૨૦૨૫ માં રમી રહી છે. ભારતે પોતાની પ્રથમ મેચ બુધવારે યુએઈ સામે રમવાની છે. આ ટુર્નામેન્ટ ભારત માટે બંને દિગ્ગજ ખેલાડીઓ વગરની પ્રથમ મોટી ટૂર્નામેન્ટ છે.