ઉત્તર પ્રદેશના મથુરા અને વૃંદાવનમાં યમુના નદીનું રૌદ્ર સ્વરૂપ જોવા મળી રહ્યું છે. હરિયાણાના હાથિની કુંડ બેરેજમાંથી ત્રણ લાખ ક્યુસેકથી વધુ પાણી છોડવામાં આવતાં અને કેચમેન્ટ વિસ્તારોમાં સતત વરસાદને કારણે યમુના નદી ખતરાના નિશાનથી ઉપર વહી રહી છે. વૃંદાવનમાં, પરિક્રમા માર્ગમાં ઘૂંટણ સુધી પાણી ભરાઈ ગયું છે અને અનેક નીચાણવાળા વિસ્તારો, ખેતરો, ઘરો અને મંદિરો જળમગ્ન થઈ ગયા છે. સ્થાનિક વહીવટીતંત્ર પરિસ્થિતિ પર સતત નજર રાખી રહ્યું છે અને પૂરગ્રસ્ત વિસ્તારોમાંથી હજારો લોકોને સુરક્ષિત સ્થળોએ ખસેડવામાં આવ્યા છે. લગભગ ૪૨૦૫ જેટલા લોકોને રાહત શિબિરોમાં આશ્રય આપવામાં આવ્યો છે. શાળાઓ પણ બંધ રાખવામાં આવી છે અને લોકોની સુરક્ષા માટે પંચકોશી પરિક્રમા જેવા ધાર્મિક કાર્યક્રમો પણ હાલ પૂરતા સ્થગિત કરી દેવામાં આવ્યા છે.

સંત પ્રેમાનંદ મહારાજ પૂરગ્રસ્ત વિસ્તારોની મુલાકાતે: આ ભયાનક પરિસ્થિતિ વચ્ચે, વૃંદાવનના પ્રખ્યાત સંત પ્રેમાનંદ મહારાજ તેમના શિષ્યો સાથે યમુનાના વિરાટ સ્વરૂપના દર્શન કરવા પહોંચ્યા હતા. તેમણે એક સ્ટીમર દ્વારા પૂરગ્રસ્ત વિસ્તારોની મુલાકાત લીધી અને સ્થિતિનું નિરીક્ષણ કર્યું. આ દ્રશ્ય જોઈને તેઓ થોડો સમય શાંત થઈ ગયા અને પછી તેમણે આ ઘટનાને 'પ્રભુની લીલા' ગણાવી. તેમણે લોકોને અપીલ કરી કે આ આફતને ઈશ્વરીય પ્રકોપ ન માનતા, પરંતુ તેને પ્રકૃતિનો એક ભાગ સમજે. તેમના આ પગલાથી લોકોમાં એક આશા જાગી છે.

બાંકે બિહારી મંદિર તરફ જતા રસ્તાઓ પર પાણી ભરાયા: યમુનાના વધતા જળસ્તરને કારણે વૃંદાવનના બાંકે બિહારી મંદિર તરફ જતા વીઆઈપી માર્ગ પર ચારથી પાંચ ફૂટ પાણી ભરાઈ ગયું છે. જેના કારણે સ્થાનિક લોકો અને શ્રદ્ધાળુઓને ભારે મુશ્કેલીઓનો સામનો કરવો પડી રહ્યો છે. 

દહેરાદૂનથી ગૌતમબુદ્ધ નગર સુધીના કેટલાક વિસ્તારોમાં યમુનાનું પાણી ઘરોમાં ઘૂસી ગયું છે. 

બીજી તરફ, વૃંદાવનમાં બ્રજવાસીઓની મદદ માટે અનિરુદ્ધાચાર્ય મહારાજ પણ આગળ આવ્યા છે અને તેઓ પૂરગ્રસ્ત પરિવારો સુધી ભોજન-પાણી પહોંચાડી રહ્યા છે. તેમણે સક્ષમ લોકોને પણ મદદ માટે આગળ આવવા અપીલ કરી છે. આ જળપ્રલયને કારણે મથુરા-વૃંદાવનનું પર્યટન પોલીસ સ્ટેશન પણ પાણીમાં ડૂબી ગયું છે.

જ્યારે, બીજી બાજુ આગરામાં યમુના નદીનું પાણી તાજ મહેલની પરિમિતિની દીવાલ સુધી પહોંચી ગયું છે. પુરાતત્વ સર્વેક્ષણ વિભાગ દ્વારા પરિસ્થિતિ પર નજર રાખવામાં આવી રહી છે.