નવી દિલ્હી :પૂર્વ ઉપરાષ્ટ્રપતિ જગદીપ ધનખરે મંગળવારે તેમના અનુગામી સી.પી. રાધાકૃષ્ણનને અભિનંદન પાઠવ્યા છે. ધનખરે કહ્યું કે તેમના વિશાળ અનુભવથી ઉપરાષ્ટ્રપતિ પદ વધુ ગૌરવ પ્રાપ્ત કરશે. જુલાઈમાં પદ છોડ્યા પછી ધનખરેનું આ પહેલીવાર નિવેદન આવ્યું છે.

રાધાકૃષ્ણનને લખેલા પત્રમાં ધનખરે કહ્યું, "આ પ્રતિષ્ઠિત પદ તમારા દ્વારા ગ્રહણ કરવાથી આપણા રાષ્ટ્રના પ્રતિનિધિઓનો વિશ્વાસ અને ભરોષો પ્રતિબિંબિત થાય છે." તેમણે કહ્યું કે રાધાકૃષ્ણનના જાહેર જીવનમાં વિશાળ અનુભવને જોતાં, તેમના નેતૃત્વ હેઠળ આ પદ "ચોક્કસપણે વધુ સન્માન અને ગૌરવ" મેળવશે.

એક આશ્ચર્યજનક પગલામાં ધનખરે 21 જુલાઈના રોજ સ્વાસ્થ્યના કારણોસર ઉપરાષ્ટ્રપતિ પદ પરથી રાજીનામું આપ્યું હતું. તેમના અચાનક રાજીનામા બાદ ઉપરાષ્ટ્રપતિ પદ માટે ચૂંટણી યોજાઈ છે.

 મંગળવારે યોજાયેલી ઉપરાષ્ટ્રપતિ ચૂંટણીમાં રાષ્ટ્રીય લોકશાહી જોડાણ (એનડીએ) ના ઉમેદવાર રાધાકૃષ્ણન 452 મત મેળવીને જીત્યા હતા, જ્યારે વિપક્ષી ઉમેદવાર બી. સુદર્શન રેડ્ડીને 300 મત મળ્યા હતા.

સીપી રાધાકૃષ્ણન એક અગ્રણી ભારતીય રાજકારણી છે. હવે તેઓ ભારતના 15મા ઉપરાષ્ટ્રપતિ તરીકે સેવા આપી રહ્યા છે. તેઓ લાંબા સમયથી ભાજપ સાથે જોડાયેલા છે. તેઓ બે વખત સાંસદ અને બે રાજ્યોના રાજ્યપાલ પણ રહી ચૂક્યા છે. રાધાકૃષ્ણન તમિલનાડુના રહેવાસી છે.