નેપાળમાં સેનાએ કબજો સંભાળ્યો : એર ઇન્ડિયા-ઈન્ડિગો ફ્લાઇટ્સ રદ
સરકારી ઇમારતો, નેતાઓના ઘરો અને પશુપતિનાથ મંદિરના દરવાજા પર પણ હુમલો કરવામાં આવ્યો મુંબઈ અને અમદાવાદ સહિતનાં ૫૦ ગુજરાતીઓ સહિત બીજા ૧૫૦થી ૨૦૦ મુસાફરો કાઠમાંડુ ઍરપોર્ટ પર અટવાઈ ગયા છે
નવી દિલ્હી, તા.૧૦: નેપાળના રસ્તાઓ પર યુવાનોના નેતળત્વમાં થયેલા વિરોધ પ્રદર્શનો હિંસક બળવામાં ફેરવાઈ ગયા. મંગળવારે પરિસ્થિતિ એટલી વણસી ગઈ કે પ્રદર્શનકારીઓએ સંસદ ભવનને આગ લગાવી દીધી. સરકારી ઇમારતો, નેતાઓના ઘરો અને પશુપતિનાથ મંદિરના દરવાજા પર પણ હુમલો કરવામાં આવ્યો. આ પછી, સેનાએ કબજો સંભાળવો પડ્યો..નેપાલમાં ફાટી નીકળેલાં તોફાનો વચ્ચે ચારેબાજુ અરાજકતાની સ્થિતિ સર્જાઈ છે ત્યારે ગઈ કાલે બપોરે ૧૨ વાગ્યાથી લગભગ ૨૦૦ મુસાફરો સાથે નેપાલના કાઠમાંડુ ઍરપોર્ટ પર અટવાયેલા અને મુંબઈમાં રહેતા પ્રિયાંક ભટ્ટે નેપાલથી ‘આપવીતી વર્ણવતાં કહ્યું હતું કે ‘ઍરપોર્ટ-સિકયૉરિટીએ અમને બધાને ઍરપોર્ટની બહાર જતા રહેવાનું સજેશન કર્યું છે, પણ નેપાલની હાલની સિચ્યુએશનમાં અમને લાગે છે કે કાઠમાંડુ ઍરપોર્ટ અમારા માટે સૌથી સુરક્ષિત જગ્યા છે એટલે અમે બહાર નહીં જઈએ.'
માનસરોવરની યાત્રા પૂરી કરીને નેપાલમાં ચાલી રહેલાં તોફાનો વચ્ચે અત્યંત ખરાબ પરિસ્થિતિમાં જેમતેમ કરીને ભારત પરત આવવા કાઠમાંડુ ઍરપોર્ટ પહોંચ્યા બાદ તમામ ફ્લાઇટ કૅન્સલ થતાં મુંબઈ અને અમદાવાદ સહિતનાં ૫૦ ગુજરાતી યાત્રિકો ઍરપોર્ટ પર ફસાઈ ગયા છે. ગુજરાતીઓ સહિત બીજા ૧૫૦થી ૨૦૦ મુસાફરો ઍરપોર્ટ પર અટવાઈ ગયા છે.
સોશિયલ મીડિયા પરનો પ્રતિબંધ હટાવવામાં આવ્યો, પરંતુ ૧૯ લોકોના મોતથી આગમાં ઘી ઉમેરવામાં આવ્યું. હિંસક વિરોધ પ્રદર્શનોને જોઈને વડા પ્રધાન કેપી શર્મા ઓલીએ રાજીનામું આપ્યું, પરંતુ શાંતિ રસ્તાઓ પર પાછી ફરી નહીં. સેના તૈનાત કરવી પડી અને પરિસ્થિતિ હજુ પણ કાબુ બહાર છે.
આ વિરોધ પ્રદર્શનો અચાનક ઉભરી આવ્યા ન હતા. નેપાળ લાંબા સમયથી ભ્રષ્ટાચાર અને રાજકીય રમતોનો ભોગ બન્યું છે. જનતા, ખાસ કરીને નવી પેઢી, કંટાળી ગઈ હતી. સોશિયલ મીડિયા પર પ્રતિબંધથી તેમના ગુસ્સામાં વધારો થયો. સોમવારે, પોલીસ ગોળીબારમાં ૧૯ લોકો માર્યા ગયા.
આ પછી, મંગળવારે વિરોધ પ્રદર્શનો વધુ હિંસક બન્યા. ભૂતપૂર્વ વડા પ્રધાન શેર બહાદુર દેઉબા પર હુમલો કરવામાં આવ્યો અને ભૂતપૂર્વ વડા પ્રધાન ઝાલનાથ ખનાલની પત્ની રાજલક્ષ્મી ચિત્રકરને રસ્તા પર જીવતા સળગાવી દેવામાં આવ્યા.
પરિસ્થિતિ નિયંત્રણ બહાર જતી જોઈને, નેપાળ સેનાએ કબજો સંભાળ્યો. મંગળવાર રાતથી, સેનાએ કાઠમંડુના ત્રિભુવન આંતરરાષ્ટ્રીય વિમાનમથક અને સિંહ દરબાર જેવા મહત્વપૂર્ણ સરકારી મથકોનો કબજો સંભાળી લીધો. આર્મી ચીફ જનરલ અશોક રાજ સિંગડેલે એક વીડિયો નિવેદનમાં વિરોધીઓને શાંતિની અપીલ કરી. તેમણે કહ્યું, આપણે સાથે મળીને દેશને આ મુશ્કેલ સમયમાં બહાર કાઢવો પડશે. હિંસા ફક્ત નુકસાન પહોંચાડશે. વાતચીતનો માર્ગ અપનાવો. જનરલ સિગ્ડેલે મળતકોના પરિવારો પ્રત્યે સંવેદના વ્યક્ત કરી અને ઘાયલોના ઝડપથી સ્વસ્થ થવાની કામના કરી. પરંતુ આ છતાં, રસ્તાઓ પરનો ગુસ્સો ઓછો થઈ રહ્યો નથી. હજારો વિરોધીઓ હજુ પણ રસ્તાઓ પર છે, રસ્તાઓ અવરોધિત છે અને સરકારી કચેરીઓ પર હુમલા ચાલુ છે.
સેનાના હેલિકોપ્ટર કેટલાક મંત્રીઓને સલામત સ્થળોએ લઈ ગયા, પરંતુ પરિસ્થિતિ હજુ પણ નાજુક છે. રાષ્ટ્રપતિ રામ ચંદ્ર પૌડેલે પણ પ્રદર્શનકારીઓને શાંતિ અને વાતચીત માટે અપીલ કરી.
નેપાળમાં આ અશાંતિ ભારત પર પણ અસર કરી રહી છે. ઉત્તરાખંડના મુખ્યમંત્રી પુષ્કર સિંહ ધામીએ નેપાળ સરહદ પર સુરક્ષા કડક બનાવવાનો આદેશ આપ્યો છે.
ચંપાવત, પિથોરાગઢ અને ઉધમ સિંહ નગર જેવા સરહદી જિલ્લાઓમાં સશષા સીમા દળ (SSB) અને પોલીસને હાઇ એલર્ટ પર રાખવામાં આવી છે. સોશિયલ મીડિયા પર અફવાઓ અને ભડકાઉ સામગ્રી પર નજર રાખવા માટે પણ ખાસ વ્યવસ્થા કરવામાં આવી છે. બીજી તરફ, કર્ણાટકના ૩૯ લોકો કાઠમંડુ એરપોર્ટ પર ફસાયેલા છે. કર્ણાટકના મુખ્યમંત્રી સિદ્ધારમૈયાએ તેમના સુરક્ષિત પરત માટે તાત્કાલિક પગલાં લેવા સૂચના આપી છે.
નેપાળમાં અશાંતિને કારણે સેંકડો ફ્લાઇટ્સ રદ કરવામાં આવી છે. ભારતના વડાપ્રધાન નરેન્દ્ર મોદીએ પણ આ હિંસા પર દુઃખ વ્યક્ત કર્યું છે. તેમણે X પર નેપાળી ભાષામાં લખ્યું, ‘૧૯ યુવાનોના મોત હૃદયદ્રાવક છે. નેપાળની શાંતિ અને સ્થિરતા ખૂબ જ મહત્વપૂર્ણ છે. હું દરેકને શાંતિ જાળવવા અપીલ કરું છું.'
દુનિયા નેપાળમાં આ અશાંતિ પર નજર રાખી રહી છે. રશિયાએ પણ આ કટોકટી પર ચિંતા વ્યક્ત કરી અને શાંતિપૂર્ણ ઉકેલ માટે અપીલ કરી. રશિયન વિદેશ મંત્રાલયે કહ્યું, ‘અમે નેપાળમાં પરિસ્થિતિ પર નજર રાખી રહ્યા છીએ. આ વિરોધ હવે રમખાણોમાં ફેરવાઈ ગયો છે. અમે ઇચ્છીએ છીએ કે નેપાળ શકય તેટલી વહેલી તકે સામાન્ય થાય.'
રશિયાએ તેના નાગરિકોને નેપાળની મુસાફરી કરવાનું ટાળવાની સલાહ આપી છે. રશિયન દૂતાવાસની આસપાસ શાંતિ છે અને કોઈપણ રશિયન નાગરિક ઘાયલ થયાના સમાચાર નથી.
નેપાળ સેનાએ એક નિવેદન બહાર પાડીને કહ્યું કે ‘વર્તમાન ગંભીર પરિસ્થિતિનો ગેરલાભ ઉઠાવીને, કેટલાક જૂથો નાગરિકો અને જાહેર સંપત્તિને વ્યાપક નુકસાન પહોંચાડી રહ્યા છે, જેમાં લૂંટફાટ અને આગચંપીનો સમાવેશ થાય છે.'
સેનાએ આવી પ્રવળત્તિઓ બંધ કરવાની અપીલ ફરી એકવાર કરી. સેનાએ એક નિવેદનમાં કહ્યું કે જો આવી પ્રવળત્તિઓ બંધ નહીં થાય તો અમે કડક કાર્યવાહી કરીશું.
(10:04 AM IST)
છેલ્લા 8 દિવસમાં સૌથી લોકપ્રિય 
