કાઠમંડુ, તા.૧૦: નેપાળમાં બે દિવસના આંદોલનને કારણે ભૈરહવાનું ગૌતમ બુદ્ધ ડોમેસ્‍ટિક અને ઇન્‍ટરનેશનલ એરપોર્ટ બંધ કરી દેવામાં આવ્‍યું છે. આ કારણે સેંકડો ભારતીય પ્રવાસી નેપાળમાં અટવાઈ ગયા છે. પોખરા અને કાઠમંડુમાં ઘણી હોટલો ભારતીય પ્રવાસીઓથી ભરેલી છે, જે ટ્રાફિક અને કફર્યુને કારણે ભારત પાછા ફરી શકતા નથી. આ દરમિયાન નેપાળના કસ્‍ટમ્‍સ બંધ થવાને કારણે સોનાલી સરહદ પર લગભગ આઠ કિલોમીટર લાંબો જામ છે.

એવું કહેવામાં આવી રહ્યું છે કે, પોખરામાં લગભગ ૮૦૦ ભારતીય પ્રવાસીઓ ફસાયેલા છે, જ્‍યારે કાઠમંડુમાં આ સંખ્‍યા ૨૦૦૦ની નજીક છે. હોટલ માલિકોએ ભારતીય પ્રવાસીઓની યાદી પણ વહીવટીતંત્રને સોંપી છે, જેથી તેમની સલામતી અને સરહદ સુધી સલામત પહોંચ સુનિશ્‍ચિત કરી શકાય. ભૈરહવા એરપોર્ટ બંધ થવાથી નેપાળમાં ફસાયેલા ભારતીયોના પરત ફરવામાં મુશ્‍કેલીઓ વધુ વધી ગઈ છે, જ્‍યારે સરહદી વિસ્‍તારમાં વેપાર અને ટ્રાફિક સંપૂર્ણપણે ખોરવાઈ ગયો છે. નેપાળ વહીવટીતંત્ર અને સુરક્ષા એજન્‍સીઓ સાથે મળીને મુસાફરોની સુરક્ષા જાળવવાનો પ્રયાસ કરી રહ્યા છે.

પોખરા અને કાઠમંડુમાં ફસાયેલા પ્રવાસીઓનું કહેવું છે કે, કફર્યુને કારણે તેઓ તેમની હોટલોમાંથી બહાર પણ નીકળી શકતા નથી. ભારતથી નેપાળ આવતા ટ્રાન્‍સપોર્ટરો પણ વેરહાઉસમાંથી પોતાનો માલ બહાર કાઢી શકતા નથી, જેના કારણે સ્‍ટોરેજની સમસ્‍યા સર્જાઈ છે. સોનાલી, નૌતનવા અને અન્‍ય ચેકપોઇન્‍ટ પર લગાવવામાં આવેલા SSB બેરિકેડને કારણે કડક ચેકિંગ પછી જ નેપાળી કાર્ગો અને રાહદારીઓની અવરજવર શકય છે.

નેપાળમાં બગડતી રાજકીય અને સામાજિક પરિસ્‍થિતિને કારણે નેપાળ-ભારત સરહદ પર આવેલું બેલ્‍હિયા કસ્‍ટમ મંગળવારે થોડા કલાકો માટે ખુલ્લું હતું, પરંતુ પરિસ્‍થિતિ કફોડી બનતા તેને ફરીથી બંધ કરવામાં આવ્‍યું હતું. કસ્‍ટમ બંધ થવાને કારણે સોનાલી સરહદ પર કાર્ગો વાહનોની લાંબી કતાર લાગી ગઈ હતી, જે હવે આઠ કિમી સુધી લાંબી છે. આનાથી વેપારીઓની મુશ્‍કેલીમાં વધારો થયો છે, પરંતુ સામાન્‍ય લોકો અને પ્રવાસીઓ પણ પ્રભાવિત થઈ રહ્યા છે. નેપાળના મુખ્‍ય ભાગોમાં કફર્યુ અને સુરક્ષા નાકાબંધીને કારણે સરહદી વિસ્‍તારમાં સુરક્ષા કડક કરવામાં આવી છે. કલમ ૧૪૪ પણ લાગુ છે. મંગળવારે સાંજે વિરોધીઓ સોનાલી સરહદને અડીને આવેલા બેલ્‍હિયા નેપાળ ગેટ પર પહોંચ્‍યા. બેલ્‍હિયા પોલીસ ચોકી પર ઇંટો ફેંકવામાં આવી. ઓલી ‘દેશ છોડો' જેવા નારા લગાવી રહ્યા હતા.