મુંબઈ 10 સપ્ટેમ્બર 2025: મુંબઈમાં એક અનોખી ઘટના સામે આવી છે, જ્યાં ડોક્ટરોએ એક ૩ વર્ષના માસૂમ બાળકના ફેફસામાંથી LED બલ્બ સફળતાપૂર્વક બહાર કાઢ્યો છે. આ બાળકે અજાણતા એક રમકડાની કારમાંથી LED બલ્બ ગળી લીધો હતો, જેના કારણે તેને છેલ્લા ત્રણ મહિનાથી સતત ખાંસી અને શ્વાસ લેવામાં તકલીફ થઈ રહી હતી.
 
ન્યુમોનિયા ગણીને કરવામાં આવી હતી સારવાર
બાળકના વાલીઓ શરૂઆતમાં તેની ખાંસી અને શ્વાસની તકલીફ માટે અનેક ડોક્ટરો પાસે ગયા હતા. પ્રારંભિક તપાસમાં તેને ન્યુમોનિયા હોવાનું નિદાન થયું હતું અને તેની એન્ટિબાયોટિક્સથી સારવાર પણ કરવામાં આવી હતી. જોકે, દવાઓની કોઈ અસર થઈ ન હતી અને લક્ષણોમાં કોઈ સુધારો જોવા મળ્યો ન હતો. આખરે, જ્યારે બાળકના ફેફસાનો સીટી સ્કેન કરવામાં આવ્યો, ત્યારે ડોક્ટરોને અંદર ધાતુનો એક ટુકડો હોવાનું જાણવા મળ્યું.
 
સફળ થોરાકોટોમી સર્જરી
બાળકને કોલ્હાપુરથી મુંબઈની જસલોક હોસ્પિટલ અને રિસર્ચ સેન્ટરમાં લાવવામાં આવ્યો. અહીં ડો. વિમેશ રાજપૂત અને ડો. દિવ્યા પ્રભાતે તપાસ કરતાં જાણવા મળ્યું કે બાળકના ફેફસામાં એક LED બલ્બ ફસાયેલો છે. તેમણે તાત્કાલિક થોરાકોટોમી નામની નાની સર્જરી કરીને આ બલ્બને સુરક્ષિત રીતે બહાર કાઢ્યો.

આ સફળ સર્જરી બાદ બાળકને ત્રણ મહિનાની સતત તકલીફમાંથી રાહત મળી અને તે હવે સંપૂર્ણપણે સ્વસ્થ છે. આ ઘટના ફરી એકવાર દર્શાવે છે કે બાળકો સાથે રમતા સમયે કેટલી કાળજી રાખવી જરૂરી છે, કારણ કે નાની વસ્તુઓ પણ મોટી મુશ્કેલી ઊભી કરી શકે છે.