કંગના રનૌતને સુપ્રીમ કોર્ટ તરફથી ઝટકોઃ ખેડૂતો વિરુદ્ધ નિવેદન કેસમાં અરજી ફગાવી
આ કેસ તેમની સામે દાખલ કરાયેલા માનહાનિના કેસનો છે : જે વર્ષ ૨૦૨૧ માં નોંધાયેલો હતો
નવી દિલ્હી, તા.૧૨: બોલીવુડ અભિનેત્રી અને ભાજપ સાંસદ કંગના રનૌતને સુપ્રીમ કોર્ટ તરફથી મોટો ઝટકો લાગ્યો છે. કંગના રનૌત સામે ચાલી રહેલો માનહાનિનો કેસ ચાલુ રહેશે. સુપ્રીમ કોર્ટે કંગના રનૌતની માનહાનિના કેસને રદ કરવાની અરજી પર સુનાવણી કરવાનો ઇનકાર કરી દીધો છે. તમને જણાવી દઈએ કે ખેડૂત આંદોલન દરમિયાન કંગના રનૌતે ખેડૂતો વિરુદ્ધ વિવાદાસ્પદ ટિપ્પણી કરી હતી, જેના કારણે તેમની સામે માનહાનિનો કેસ દાખલ કરવામાં આવ્યો હતો.
સુપ્રીમ કોર્ટમાં કંગના રનૌત તરફથી દલીલ કરતી વખતે, તેમના વકીલે દલીલ કરી હતી કે તેણીએ ફક્ત એક ટ્વીટ રીટ્વીટ કર્યું હતું. ઘણા અન્ય લોકોએ પણ તે ટ્વીટ રીટ્વીટ કર્યું હતું. આ દલીલના જવાબમાં, સુપ્રીમ કોર્ટે કહ્યું કે તે ફક્ત એક રીટ્વીટ નહોતું, પરંતુ તેમાં કંગના રનૌતની ટિપ્પણી પણ શામેલ હતી. જો આ ટ્રાયલનો મામલો છે, તો તમે તમારી વાત નીચલી કોર્ટમાં મૂકો. જો ત્યાંથી નિર્ણય આવે, તો જ આ મામલો વધુ તપાસવામાં આવશે.
કંગના રનૌત વિરુદ્ધ માનહાનિનો કેસ ૭૩ વર્ષીય મહિન્દર કૌર દ્વારા વર્ષ ૨૦૨૧ માં પંજાબની ભટિંડા કોર્ટમાં દાખલ કરવામાં આવ્યો હતો. ફરિયાદમાં કહેવામાં આવ્યું છે કે કંગનાએ એક પોસ્ટ રીટ્વીટ કરી અને તેના વિરુદ્ધ ટિપ્પણી કરી, જેનાથી તેને બદનામ કરવામાં આવી. કંગનાએ તેના રીટ્વીટમાં મહિન્દર કૌરના ફોટા સાથેની ટ્વિટ રીટ્વીટ કરી અને કહ્યું કે આ એ જ બિલીકિસ બાનો દાદી છે, જે શાહીન બાગ વિરોધ પ્રદર્શનનો ભાગ હતી. તે ૧૦૦ રૂપિયામાં ઉપલબ્ધ છે.
સુપ્રીમ કોર્ટ પહેલાં, પંજાબ અને હરિયાણા હાઇકોર્ટે પણ કંગના રનૌતની અરજી ફગાવી દીધી છે. હાઇકોર્ટે કંગનાની અરજી ફગાવી દેતા કહ્યું હતું કે કંગના રનૌત એક અભિનેત્રી છે. તેના પર ફરિયાદીની પ્રતિષ્ઠાને કલંકિત કરવાનો આરોપ મૂકવામાં આવ્યો છે. ફરિયાદીએ આરોપ લગાવ્યો છે કે કંગનાના રીટ્વીટ અને ટિપ્પણીઓથી તેની છબી કલંકિત થઈ છે. રીટ્વીટ અને ટિપ્પણીઓથી કંગનાની છબી પણ પ્રભાવિત થઈ રહી છે, ફરિયાદીએ કોઈ દ્વેષપૂર્ણ ટિપ્પણી સાથે કેસ દાખલ કર્યો નથી. તેથી આ મામલાની તપાસ થવી જોઈએ.(૨૩.૧૮)
(3:16 PM IST)
છેલ્લા 8 દિવસમાં સૌથી લોકપ્રિય 
