૧૪ સપ્ટેમ્બરથી વૈષ્ણોદેવી યાત્રા ફરી શરૂ થશે : ફરીથી ‘જય માતા દી'ના નારાથી ગુંજશે
ખરાબ હવામાન અને ટ્રેકના જરૂરી સમારકામના કારણે અસ્થાયીરૂપે મુલતવી રાખી હતી
જમ્મુ, તા.૧૨: ખરાબ હવામાન અને ટ્રેકના જરૂરી સમારકામના કારણે અસ્થાયી રૂપે મુલતવી રાખેલી શ્રી માતા વૈષ્ણોદેવી યાત્રા ફરી શરૂ થવાના સમાચાર સામે આવ્યા છે. હવે ટૂંક સમયમાં આખો રૂટ ફરીથી ‘જય માતા દી' ના નારાથી ગુંજી ઉઠશે. તાજેતરમાં પર્વતોમાં ભારે વરસાદને કારણે ભૂસ્ખલનની એક મોટી ઘટના બની હતી. ઘણા મુસાફરોએ પણ જીવ ગુમાવ્યા હતા.
હવે હવામાનમાં પલટો આવ્યો છે. વરસાદ દરમિયાન નુકસાન પામેલા ટ્રેકનું સમારકામ કરવામાં આવ્યું છે. હવે યાત્રા ૧૪ સપ્ટેમ્બરથી ફરી શરૂ થશે. જો હવામાન પ્રતિકૂળ રહેશે તો શ્રાઇન બોર્ડ આગળનો નિર્ણય લેશે.
આ માહિતી આપતા શ્રી માતા વૈષ્ણોદેવી શ્રાઇન બોર્ડે જણાવ્યું હતું કે ભક્તોની સલામતી અને સુવિધાને ધ્યાનમાં રાખીને, છેલ્લા દિવસોમાં યાત્રા બંધ કરવી પડી હતી. ટ્રેક પર સમારકામ અને જાળવણીનું કામ પૂર્ણ થઈ ગયું છે. શ્રાઇન બોર્ડે ભક્તોને યાત્રા પર નીકળતા પહેલા હવામાનની સ્થિતિ અને બોર્ડની નવીનતમ સલાહ તપાસવાની અપીલ કરી છે.
જમ્મુ અને કાશ્મીરના રિયાસી જિલ્લાના કટરાથી શ્રી માતા વૈષ્ણોદેવી યાત્રા ૨૬ ઓગસ્ટથી સ્થગિત કરવામાં આવી છે. યાત્રા માર્ગ પર ભૂસ્ખલનને કારણે યાત્રા સ્થગિત કરવામાં આવી છે. ઉલ્લેખનીય છે કે ૨૬ ઓગસ્ટના રોજ અર્ધકુમારીમાં ઇન્દ્રપ્રસ્થ ભોજનાલય પાસે ભારે વરસાદને કારણે થયેલા ભૂસ્ખલનમાં ૩૪ લોકો માર્યા ગયા હતા, જેમાં મોટાભાગના યાત્રાળુઓ હતા, જ્યારે ઘણા લોકો ઘાયલ થયા હતા. વેપારીઓએ માંગ કરી હતી કે શ્રાઇન બોર્ડ ઓછામાં ઓછું યાત્રા ફરી શરૂ કરવા અંગે પરિસ્થિતિ સ્પષ્ટ કરે, કારણ કે નવરાત્રિ પણ ૨૨ સપ્ટેમ્બરથી શરૂ થવા જઈ રહી છે.
જમ્મુ અને કાશ્મીરના લેફ્ટનન્ટ ગવર્નર અને શ્રી માતા વૈષ્ણોદેવી શ્રાઇન બોર્ડના અધ્યક્ષ મનોજ સિન્હાએ ૨૬ ઓગસ્ટના રોજ ભૂસ્ખલનના કારણોની તપાસ માટે ઉચ્ચ સ્તરીય ત્રણ સભ્યોની સમિતિની રચના કરી છે. જમ્મુ અને કાશ્મીર જળ શક્તિ વિભાગના અધિક મુખ્ય સચિવ શાલીન કાબરાના નેતળત્વ હેઠળની આ સમિતિમાં જમ્મુ વિભાગીય કમિશનર રમેશ કુમાર અને જમ્મુ પોલીસ મહાનિરીક્ષક બીએસ તુતીનો સમાવેશ થાય છે અને તે બે અઠવાડિયામાં લેફ્ટનન્ટ ગવર્નર સિન્હાને એક વ્યાપક અહેવાલ સુપરત કરશે.(૨૩.૨૨)
(3:44 PM IST)
છેલ્લા 8 દિવસમાં સૌથી લોકપ્રિય 
