રશિયાના કામચાટકામાં ૭.૪ની તીવ્રતાનો ભયંકર ભૂકંપ : સુનામીનું એલર્ટ
હાલમાં કોઈ જાનમાલનું નુકશાન નથી : ભૂકંપનું કેન્દ્ર પળથ્વીથી ૩૯.૫ કિલોમીટરની ઊંડાઈએ હતું
નવી દિલ્હી, તા.૧૩: રશિયાના કામચટકા પ્રદેશના દરિયાકાંઠે ૭.૪ ની તીવ્રતાનો શક્તિશાળી ભૂકંપ આવ્યો હતો. યુએસ જીઓલોજિકલ સર્વે (યુએસજીએસ) એ આ વાતની પુષ્ટિ કરી છે. ભૂકંપની ઊંડાઈ સમુદ્રની નીચે હતી, જેના કારણે આસપાસના વિસ્તારોમાં તેના આંચકા જોરદાર અનુભવાયા હતા. આ એ જ વિસ્તાર છે જ્યાં જુલાઈમાં ૮.૮ ની તીવ્રતાનો મોટો ભૂકંપ આવ્યો હતો અને તે સમયે પેસિફિક મહાસાગરના ઘણા ભાગોમાં સુનામીની ચેતવણી જારી કરવી પડી હતી. આ કારણોસર, તાજેતરના ભૂકંપથી લોકોમાં ચિંતા વધી ગઈ છે. જો કે, હાલમાં કોઈ જાનમાલના નુકસાનના સમાચાર નથી. સ્થાનિક અધિકારીઓએ જણાવ્યું હતું કે તેઓ પરિસ્થિતિ પર નજર રાખી રહ્યા છે અને લોકોને દરિયા કિનારાથી દૂર રહેવાની અપીલ કરવામાં આવી છે. વૈજ્ઞાનિકોએ ચેતવણી આપી છે કે ભૂકંપના કેન્દ્રની આસપાસ ૩૦૦ કિલોમીટરની ત્રિજ્યામાં સમુદ્રમાં ખતરનાક અને વિનાશક મોજા ઉછળવાની શકયતા છે, જે સુનામી લાવી શકે છે.
જર્મન રિસર્ચ સેન્ટર ફોર જીઓસાયન્સ (GFZ) અનુસાર, આજે રશિયામાં કામચટકામાં આવેલા ભૂકંપનું કેન્દ્ર પળથ્વીથી ૧૦ કિલોમીટર (૬.૨ માઇલ) ની ઊંડાઈએ જોવા મળ્યું હતું અને તેની તીવ્રતા રિક્ટર સ્કેલ પર ૭.૧ હતી. બીજી તરફ, યુનાઇટેડ સ્ટેટ્સ જીઓલોજિકલ સર્વે (USGS) એ દાવો કર્યો છે કે ભૂકંપની તીવ્રતા રિક્ટર સ્કેલ પર ૭.૪ હતી અને ભૂકંપનું કેન્દ્ર પળથ્વીથી ૩૯.૫ કિલોમીટર (૨૪.૫ માઇલ) ની ઊંડાઈએ હતું.
યુએસ પેસિફિક સુનામી ચેતવણી કેન્દ્રે માહિતી આપી હતી કે ભૂકંપ દરિયાકાંઠાના વિસ્તારોને અસર કરી શકે છે. પ્રારંભિક મૂલ્યાંકન મુજબ, પેસિફિક મહાસાગરના નજીકના ભાગોમાં સુનામીનો ભય હોઈ શકે છે. હવાઈ જેવા દૂરના વિસ્તારોમાં હજુ સુધી પરિસ્થિતિ સ્પષ્ટ નથી. PTWC એ જણાવ્યું હતું કે હાલમાં એ કહેવું ખૂબ જ વહેલું છે કે ત્યાં સુનામીનો ખતરો છે કે નહીં.
સ્થાનિક મીડિયા અહેવાલો અનુસાર, ભૂકંપ પછી લોકો પોતાના ઘરોમાંથી બહાર નીકળી ગયા હતા. વહીવટીતંત્રે દરિયા કિનારે રહેતા લોકોને ચેતવણી આપી છે. તે જ સમયે, આપત્તિ વ્યવસ્થાપન એજન્સીઓ સતત પરિસ્થિતિ પર નજર રાખી રહી છે અને દર કલાકે અપડેટ્સ જારી કરવાની જાહેરાત કરી છે. કામચટકા પ્રદેશ જ્વાળામુખી અને ભૂકંપની પ્રવળત્તિઓ માટે સંવેદનશીલ માનવામાં આવે છે. અહીં દરરોજ નાના અને મોટા આંચકા આવતા રહે છે. પરંતુ ૭.૪ જેવી તીવ્રતાનો ભૂકંપ અત્યંત ખતરનાક માનવામાં આવે છે, કારણ કે તે મોટા પાયે સુનામીનું કારણ બની શકે છે.
કામચટકા દ્વીપકલ્પ એક એવો વિસ્તાર છે જ્યાં વારંવાર ભૂકંપ આવે છે. જુલાઈમાં આવેલા ભૂકંપને કારણે, રશિયા, અમેરિકા, જાપાન, હવાઈ, ચિલી, કોસ્ટા રિકા અને અન્ય દેશોમાં સુનામીની ચેતવણી જારી કરવામાં આવી હતી. ૧૯૫૨માં, કામચાટકામાં ૯.૦ ની તીવ્રતાનો એક પ્રચંડ ભૂકંપ આવ્યો હતો, જેને અત્યાર સુધીના સૌથી શક્તિશાળી ભૂકંપોમાંનો એક માનવામાં આવે છે.
(11:16 AM IST)
છેલ્લા 8 દિવસમાં સૌથી લોકપ્રિય 
