નવી દિલ્હી: વડાપ્રધાન નરેન્દ્ર મોદીએ શનિવારે મિઝોરમને ભારતીય રેલવે નેટવર્ક સાથે જોડતી બેરાબી-સેરાંગ નવી રેલવે લાઇનનું ઉદ્ઘાટન કર્યું છે. આ ઐતિહાસિક ઉદ્ઘાટન સાથે, મિઝોરમની રાજધાની આઈઝોલ હવે ભારતના રેલવે નકશા પર સ્થાન પામ્યું છે. વડાપ્રધાને આ પ્રસંગે ત્રણ ટ્રેનોને લીલી ઝંડી પણ બતાવી હતી.
આ રેલવે લાઇન ૮,૦૭૦ કરોડ રૂપિયાથી વધુના ખર્ચે તૈયાર કરવામાં આવી છે. આ પ્રોજેક્ટમાં જટિલ ભૌગોલિક પરિસ્થિતિઓને કારણે ૪૫ સુરંગો, ૫૫ મોટા પુલ અને ૮૮ નાના પુલ બનાવવામાં આવ્યા છે.
પીએમ મોદી શનિવારે આ કાર્યક્રમમાં વીડિયો કોન્ફરન્સિંગ દ્વારા જોડાયા હતા. ખરાબ હવામાનને કારણે તેઓ આઈઝોલ પહોંચી શક્યા ન હોવા છતાં, તેમણે મિઝોરમ એરપોર્ટ પરથી જ વર્ચ્યુઅલી કાર્યક્રમમાં ભાગ લીધો અને સંબોધન કર્યું. તેમણે કહ્યું કે આ દિવસ રાષ્ટ્ર અને ખાસ કરીને મિઝોરમના લોકો માટે એક ઐતિહાસિક દિવસ છે.
વડાપ્રધાને ઉમેર્યું કે, "કેટલાક વર્ષો પહેલા મને આઈઝોલ રેલવે લાઇનનો શિલાન્યાસ કરવાનો અવસર મળ્યો હતો અને આજે તેને દેશવાસીઓને સમર્પિત કરતા ગર્વ અનુભવીએ છીએ." તેમણે આ પ્રોજેક્ટને સફળ બનાવવા માટે એન્જિનિયરોની કુશળતા અને કાર્યકરોના ઉત્સાહની પ્રશંસા કરી.
પીએમ મોદીએ જણાવ્યું કે આ રેલવે લાઇન મિઝોરમના સેરાંગને સીધા રાષ્ટ્રીય રાજધાની દિલ્હી સાથે જોડશે. તેમણે આ રેલવેને માત્ર એક લાઇન નહીં, પરંતુ પરિવર્તનની જીવાદોરી ગણાવી. આનાથી મિઝોરમના લોકોના જીવન અને આજીવિકામાં ક્રાંતિ આવશે, ખેડૂતો અને ઉદ્યોગપતિઓ દેશભરના બજારો સુધી પહોંચી શકશે, અને શિક્ષણ તથા આરોગ્ય સેવાના વધુ સારા અવસરો પણ પ્રાપ્ત થશે. આ વિકાસથી અનેક ક્ષેત્રોમાં રોજગારીની નવી તકો પણ ઊભી થશે.