વોશિંગ્ટન: અમેરિકાના રાષ્ટ્રપતિ ડોનાલ્ડ ટ્રમ્પે ચીનને ફરી પોતાના અલગ અંદાઝમાં  ધમકી આપી છે. તેમણે કહ્યું છે કે જ્યાં સુધી રશિયા-યુક્રેન યુદ્ધ સમાપ્ત નહીં થાય ત્યાં સુધી ચીન પર ૫૦%થી ૧૦૦% ટેરિફ લાદવામાં આવશે. આ ટેરિફ, યુદ્ધ સમાપ્ત થયા બાદ, ઉઠાવી લેવામાં આવશે. ટ્રમ્પે નાટો દેશોને પણ અપીલ કરી છે કે તેઓ રશિયન તેલની ખરીદી બંધ કરે અને રશિયા પર કડક પ્રતિબંધો લાદવામાં મદદ કરે. તેમણે કહ્યું છે કે આ પગલાંથી યુદ્ધ જલ્દી સમાપ્ત થઈ શકે છે અને હજારો જીવન બચી શકે છે.

અંગ્રેજી મીડિયા પ્લેટફોર્મ્સ પરથી મળતી વિગતો અનુસાર, ટ્રમ્પે યુરોપિયન યુનિયન (ઈયુ)ને પણ ચીન અને ભારત પર ૧૦૦% ટેરિફ લાદવાની માંગ કરી છે. તેમનો તર્ક છે કે આનાથી રશિયા પર આર્થિક દબાણ વધશે અને તે યુદ્ધ સમાપ્ત કરવા મજબૂર થશે. બીબીસી અને યાહુ ન્યૂઝ જેવા પ્લેટફોર્મ્સ પર આ અંગે વિગતવાર અહેવાલો પ્રકાશિત થયા છે, જેમાં ટ્રમ્પના આ પગલાંને રશિયા પરના ચીનના આર્થિક સમર્થનને તોડવા તરીકે જોવામાં આવે છે.