નવી દિલ્હી: વડા પ્રધાન નરેન્દ્રભાઈ  મોદીએ શનિવારે કહ્યું હતું કે ભારત રત્ન ભૂપેન હજારિકાના ગીતો ભારતને એક કરે છે. તેમનો અવાજ લોકોમાં ઉર્જાનો સંચાર કરે છે. મોદીએ કહ્યું હતું કે ભૂપેન હજારિકાએ એવા સમયે સંયુક્ત ઉત્તરપૂર્વને અવાજ આપ્યો હતો જ્યારે આ પ્રદેશમાં હિંસા ચરમસીમાએ હતી.

    પ્રખ્યાત ગાયક ભૂપેન હજારિકાના જન્મશતાબ્દી સમારોહને સંબોધતા, પીએમ મોદીએ કહ્યું, મને આસામમાં ભૂપેન હજારિકાના જન્મશતાબ્દી સમારોહનો ભાગ બનવાનો ગર્વ છે. ભૂપેન દા ભલે શારીરિક રીતે હાજર ન હોય, પરંતુ તેમનો અવાજ લોકોમાં ઉર્જાનો સંચાર કરે છે. તેમના ગીતો ભારતને એક કરે છે. તેમનું સંગીત 'એક ભારત શ્રેષ્ઠ ભારત' ના સિદ્ધાંતને મૂર્તિમંત કરે છે. તેઓ ભારતની સાંસ્કૃતિક પરંપરાઓ સાથે ઊંડે સુધી જોડાયેલા હતા
    પીએમ મોદીએ કહ્યું કે ભૂપેન હજારિકાને ભારત રત્ન એવોર્ડ આપવો એ સમગ્ર પૂર્વોત્તર માટે સન્માન છે. આ પ્રસંગે પીએમ મોદીએ ભૂપેન હજારિકાને સમર્પિત પુસ્તકનું વિમોચન કર્યું અને 100 રૂપિયાનો સ્મારક સિક્કો બહાર પાડ્યો.

   પ્રધાનમંત્રીએ કહ્યું કે, પૂર્વોત્તરની પ્રગતિ વિના આપણે દેશના વિકાસની કલ્પના પણ કરી શકતા નથી. કેન્દ્ર સરકાર સાંસ્કૃતિક જોડાણ પર ભાર મૂકી રહી છે, જેના કારણે આખો દેશ પૂર્વોત્તરના ઇતિહાસ અને વારસાથી પરિચિત થઈ રહ્યો છે. ભૂપેન હજારિકાની જન્મ શતાબ્દી ઉજવણી એક વર્ષ સુધી ચાલશે. ભૂપેનનો જન્મ 8 સપ્ટેમ્બર 1926 ના રોજ તિનસુકિયા જિલ્લાના સદિયામાં થયો હતો

   આસામના મુખ્યમંત્રી હિમંતા બિસ્વા શર્માએ ભૂપેન હજારિકા જન્મ શતાબ્દી ઉજવણીમાં આવવા બદલ વડા પ્રધાન મોદીનો આભાર વ્યક્ત કર્યો છે. તત્કાલીન વડા પ્રધાન મનમોહન સિંહ પર કટાક્ષ કરતાં તેમણે કહ્યું કે, જ્યારે 2011 માં ભૂપેન દાનું અવસાન થયું ત્યારે આસામના લોકો ઇચ્છતા હતા કે ભારત સરકારનો પ્રતિનિધિ આસામ આવે અને તેમને શ્રદ્ધાંજલિ આપે. અમે ઇચ્છતા હતા કે વડા પ્રધાન તેમના અંતિમ સંસ્કાર સમયે શ્રદ્ધાંજલિ આપે, પરંતુ અમારું સ્વપ્ન પૂરું થયું નહીં. મનમોહન સિંહ પણ આસામથી રાજ્યસભાના સભ્ય હતા.

   હિમંતાએ કહ્યું, મોદીજી ભૂપેન દાના જન્મ શતાબ્દી ઉજવણીનો ભાગ બનવા આવ્યા છે. તેમણે ભૂપેન દા પ્રત્યે જે રીતે આદર દર્શાવ્યો છે, તે આસામના લોકો ક્યારેય ભૂલી શકશે નહીં.