ન્યુ યોર્ક: યુનાઈટેડ સ્ટેટ્સમાં એક ૨૩ વર્ષીય યુવાન નીલ હર્શમેને વોલ સ્ટ્રીટ પર એસેટ મેનેજર તરીકેની આકર્ષક નોકરી છોડીને એક ફ્રોઝન યોગર્ટ ચેઇન ખરીદી. સાત વર્ષના સમયગાળામાં, તે કંપનીનો CEO અને બહુમતી માલિક બની ગયો છે. તેમની કંપની '૧૬ હેન્ડલ્સ' (16 Handles) એ ૨૦૨૪માં સિસ્ટમ-વાઇડ વેચાણથી ૨૦.૬ મિલિયન ડોલર (લગભગ ₹૧૮૫ કરોડ) ની કમાણી કરી છે, જ્યારે ૨૦૨૫ના પ્રથમ અર્ધવાર્ષિક ગાળામાં જ ૧૨.૫ મિલિયન ડોલર (લગભગ ₹૧૧૦ કરોડ)નું વેચાણ નોંધાવ્યું છે.
૨૦૧૭માં ન્યુ યોર્ક આવ્યા બાદ નીલ હર્શમેન તેમના એપાર્ટમેન્ટ નજીક આવેલી '૧૬ હેન્ડલ્સ'ના નિયમિત ગ્રાહક બની ગયા હતા. આ એક સેલ્ફ-સર્વ ફ્રોઝન યોગર્ટ કંપની છે, જ્યાં ગ્રાહકો પોતાની પસંદગી મુજબ યોગર્ટ ડેઝર્ટ બનાવી શકે છે. ૨૦૧૯માં તેમણે પોતાની ફાઇનાન્સની નોકરી છોડીને પોતાની બચત અને નાના વેપાર લોનનો ઉપયોગ કરીને લગભગ ૫,૬૦,૦૦૦ ડોલર (લગભગ ₹૫ કરોડ) ના રોકાણ સાથે તેની પ્રથમ ફ્રેન્ચાઇઝી ખરીદી.
સીએનબીસી મેક ઇટ સાથેની વાતચીતમાં તેમણે જણાવ્યું કે, "હું દિવસ-રાત સંપૂર્ણ શિફ્ટ માટે રજિસ્ટર પર કામ કરતો હતો. તેનાથી મને અંદરથી ધંધો સમજવામાં મદદ મળી."
ડૂબતા ઉદ્યોગને પુનર્જીવિત કર્યો:
એક સમયે ટીસીબીવાય (TCBY) અને મેન્ચીઝ (Menchie’s) જેવી બ્રાન્ડ્સથી ભરેલો સેલ્ફ-સર્વ ફ્રોઝન યોગર્ટ ઉદ્યોગ ૨૦૧૬થી સંકોચાઈ રહ્યો હતો. પરંતુ હર્શમેનનું કહેવું છે કે ૨૦૨૨માં તેમણે કંપનીનો કબજો લીધા બાદ માંગમાં ભારે "ઉછાળો" આવ્યો છે. વાર્ષિક ધોરણે વેચાણમાં ૧૦% થી વધુનો વધારો થયો છે.
૨૦૨૨ સુધીમાં, નીલ હર્શમેન છ આઉટલેટ્સના માલિક અને સૌથી મોટા ફ્રેન્ચાઇઝી બની ગયા હતા. તેમણે પોતાના સ્ટોર્સને ગીરવે મૂકીને કંપનીનું અધિગ્રહણ કર્યું. આજે, '૧૬ હેન્ડલ્સ'ના યુએસમાં ૪૦ આઉટલેટ્સ છે, જે મોટાભાગે ઈસ્ટ કોસ્ટ પર આવેલા છે. યુટ્યુબ કોમેડિયન ડેની ડંકન અને અન્ય રોકાણકારો પણ આ કંપનીમાં હિસ્સો ધરાવે છે.
નીલ હર્શમેનનો ફેવરિટ ઓર્ડર:
તેમનો પોતાનો મનપસંદ ઓર્ડર એક ટાર્ટ સ્વર્લ છે જેમાં બેરી, ચોકલેટ ચિપ્સ અને હેઝલનટ ક્રંચ હોય છે, જોકે તેઓ તેને અઠવાડિયામાં માત્ર થોડી વાર જ ખાય છે.