નવી દિલ્હી/અમદાવાદ: દેશભરમાં ચાર મહિના સુધી ધમાકેદાર વરસાદ વરસાવ્યા બાદ નૈઋત્ય ચોમાસાએ હવે વિદાય લેવાનું શરૂ કરી દીધું છે. ભારતીય હવામાન વિભાગ (આઈ એમ ડી) એ આજે, ૧૪ સપ્ટેમ્બર, ૨૦૨૫ ના રોજ સત્તાવાર રીતે જાહેરાત કરી છે કે દક્ષિણ-પશ્ચિમ ચોમાસું પશ્ચિમી રાજસ્થાનના કેટલાક ભાગોમાંથી પાછું ખેંચાઈ ગયું છે. આ સાથે જ આગામી બે થી ત્રણ દિવસમાં પંજાબના કેટલાક વિસ્તારો અને ગુજરાતમાંથી પણ ચોમાસાની વિદાય માટેની પરિસ્થિતિ અનુકૂળ બની રહી છે.

 

 

ટ્વિટર પર હવામાનનું વિશ્લેષણ કરતી સંસ્થા 'સાયક્લોન એનાલાઈઝર્સ' દ્વારા પણ પશ્ચિમી પંજાબમાંથી ચોમાસાની વિદાય થઈ હોવાની જાણકારી આપવામાં આવી હતી. તેમના જણાવ્યા અનુસાર, આ વિદાય છેલ્લા એક દાયકામાં એટલે કે વર્ષ ૨૦૧૫ પછીની સૌથી ઝડપી વિદાય છે. વિદાયની રેખા (વિડ્રોલ લાઈન) ગુરદાસપુર અને અબોહર જેવા શહેરોમાંથી પસાર થઈ રહી હોવાનું પણ તેમણે જણાવ્યું હતું.

 

જોકે, ભારતીય હવામાન વિભાગે સ્પષ્ટ કર્યું છે કે હાલમાં વિદાયની પ્રક્રિયા પશ્ચિમ રાજસ્થાનથી શરૂ થઈ છે અને આગામી દિવસોમાં તે ઉત્તર-પશ્ચિમ ભારતના અન્ય ભાગોને આવરી લેશે. 

 

 

ચોમાસાની વિદાય માટેના માપદંડો, જેવા કે સતત પાંચ દિવસ સુધી વરસાદની ગેરહાજરી, નીચલા વાતાવરણમાં એન્ટી-સાયક્લોનિક સિસ્ટમની સ્થાપના અને હવામાં ભેજનું પ્રમાણ ઘટવું, હવે સ્પષ્ટપણે જોવા મળી રહ્યા છે.

 

 

આ વર્ષે ચોમાસાએ તેના નિર્ધારિત સમય કરતાં વહેલી વિદાય લીધી છે. સામાન્ય રીતે, ઉત્તર-પશ્ચિમ ભારતમાંથી ચોમાસાની વિદાય ૧૭ સપ્ટેમ્બરની આસપાસ શરૂ થતી હોય છે.

 

પંજાબમાં સરેરાશ કરતાં ૫૧% વધુ વરસાદ

આ વર્ષે ચોમાસું પંજાબ માટે અત્યંત કઠિન રહ્યું હતું. ૧ જૂનથી ૧૪ સપ્ટેમ્બર સુધીના ચોમાસાના સમયગાળા દરમિયાન, પંજાબમાં સરેરાશ કરતાં ૫૧% વધુ વરસાદ નોંધાયો છે. રાજ્યમાં સામાન્ય ૪૦૯.૭ મિમી વરસાદની સામે ૬૧૭.૧ મિમી વરસાદ ખાબક્યો હતો, જેના કારણે અનેક વિસ્તારોમાં પૂર જેવી પરિસ્થિતિ પણ સર્જાઈ હતી. હવે ચોમાસાની વિદાય સાથે વરસાદી માહોલનો અંત આવશે.

 

ગુજરાતના ખેડૂતો અને નાગરિકો પણ હવે નવરાત્રી પહેલા ચોમાસાની સત્તાવાર વિદાયની રાહ જોઈ રહ્યા છે, જે આગામી થોડા દિવસોમાં શરૂ થવાની પૂરી સંભાવના છે.

 

 

આમ ટૂંકમાં જોઈએ તો ભારતીય હવામાન વિભાગ અનુસાર, નૈઋત્ય ચોમાસાની વિદાયની સત્તાવાર શરૂઆત પશ્ચિમી રાજસ્થાનના કેટલાક ભાગોમાંથી થઈ ગઈ છે. આગામી ૨–૩ દિવસમાં પંજાબ અને ગુજરાતના કેટલાક વિસ્તારોમાંથી પણ ચોમાસું વિદાય લેશે. હવામાન વિશ્લેષકોના મતે, આ વર્ષ ૨૦૧૫ પછીની સૌથી ઝડપી ચોમાસુ વિદાય લઈ રહ્યું છે છે. આ વર્ષે પંજાબમાં સરેરાશ કરતાં ૫૧% વધુ વરસાદ નોંધાયો છે. હવે ઉત્તર-પશ્ચિમ ભારતમાં વરસાદી ગતિવિધિઓ પર પૂર્ણવિરામ મુકાવાની શક્યતા છે.

 

અહીં અત્યારે સાંજે ૭.૩૫ વાગ્યે લેવામાં આવેલ લેટેસ્ટ ઇનસેટ તસવીર પણ આપી છે.