નવી દિલ્હી : ભારતીય ખેલ જગત માટે ગર્વનો દિવસ! ભારતના યુવા સ્પીડ સ્કેટર આનંદ કુમાર વેલકુમારે 'સ્પીડ સ્કેટિંગ વર્લ્ડ ચેમ્પિયનશિપ ૨૦૨૫'માં ઇતિહાસ રચતા દેશને પહેલો ગોલ્ડ મેડલ અપાવ્યો છે. આનંદ કુમારે ચીનના બેદાઈહે ખાતે યોજાયેલી સિનિયર પુરુષોની ૧,૦૦૦ મીટર સ્પ્રિન્ટ રેસમાં આ અદ્ભુત સિદ્ધિ હાંસલ કરી. તેમની આ જીત બદલ વડાપ્રધાન નરેન્દ્ર મોદીએ પણ તેમને અભિનંદન પાઠવ્યા છે.
 
પીએમ મોદીએ અભિનંદન પાઠવ્યા
વડાપ્રધાન મોદીએ ટ્વિટર પર આનંદ કુમારની સિદ્ધિની પ્રશંસા કરતા લખ્યું, "સ્પીડ સ્કેટિંગ વર્લ્ડ ચેમ્પિયનશિપ ૨૦૨૫માં સિનિયર પુરુષોની ૧,૦૦૦ મીટર સ્પ્રિન્ટમાં ગોલ્ડ મેડલ જીતનાર આનંદ કુમાર વેલકુમાર પર ગર્વ છે. તેમની ધીરજ, ગતિ અને ઉત્સાહે તેમને સ્કેટિંગમાં ભારતનો પ્રથમ વિશ્વ ચેમ્પિયન બનાવ્યો છે. તેમની સિદ્ધિ અસંખ્ય યુવાનોને પ્રેરણા આપશે. આનંદ કુમારને અભિનંદન અને તેમના ભવિષ્યના તમામ પ્રયાસો માટે શુભેચ્છાઓ."
 
જુનિયર અને સિનિયર બંને કેટેગરીમાં ગોલ્ડ
૨૨ વર્ષીય આનંદ કુમાર વેલકુમારે ૧:૨૪.૯૨૪ મિનિટના સમય સાથે પ્રથમ સ્થાન મેળવ્યું. આ પહેલા તેમણે ૫૦૦ મીટર સ્પ્રિન્ટમાં બ્રોન્ઝ મેડલ પણ જીત્યો હતો, જે સિનિયર વર્લ્ડ ચેમ્પિયનશિપમાં ભારતનો પહેલો મેડલ હતો. રસપ્રદ વાત એ છે કે, જુનિયર કેટેગરીમાં પણ ભારતના સ્કેટર ક્રિશ શર્માએ ૧,૦૦૦ મીટર સ્પ્રિન્ટમાં ગોલ્ડ મેડલ જીત્યો છે. આ રીતે, ભારતે ૧,૦૦૦ મીટર સ્પ્રિન્ટમાં જુનિયર અને સિનિયર બંને કેટેગરીમાં ગોલ્ડ મેડલ જીતીને સ્પીડ સ્કેટિંગમાં પોતાની ક્ષમતા સાબિત કરી છે.

આનંદ કુમાર માત્ર એક ઉત્કૃષ્ટ ખેલાડી જ નહીં, પરંતુ કમ્પ્યુટર સાયન્સમાં એન્જિનિયરિંગનો અભ્યાસ કરતા એક હોશિયાર વિદ્યાર્થી પણ છે. તેમની આ જીત ભારતમાં સ્પીડ સ્કેટિંગ જેવી ઓછી જાણીતી રમતને નવી ઓળખ અને યુવાનોને પ્રેરણા આપશે. તેમની સફળતા એ દર્શાવે છે કે જો સમર્પણ અને મહેનત સાચી હોય, તો કોઈ પણ લક્ષ્ય પ્રાપ્ત કરી શકાય છે.