18 સપ્ટેમ્બર, 2025: અમદાવાદ નજીક, જાસપુર ખાતે બની રહેલું ભવ્ય ઉમિયા ધામ મંદિર હવે માત્ર આસ્થાનું કેન્દ્ર જ નહીં, પણ એક એન્જિનિયરિંગના અજાયબીનું પ્રતીક બન્યું છે. અદાણી સિમેન્ટ અને PSP ઇન્ફ્રા દ્વારા અહીં વિશ્વનું સૌથી મોટું રાફ્ટ ફાઉન્ડેશન કાસ્ટિંગ પૂર્ણ કરીને એક નવો વર્લ્ડ રેકોર્ડ સ્થાપિત કરવામાં આવ્યો છે. આ સિદ્ધિએ ભારતના નિર્માણ ક્ષેત્રમાં ટેકનોલોજી અને ટકાઉપણાના નવા બેન્ચમાર્ક સ્થાપ્યા છે.
 
54 કલાકનું અવિરત ઓપરેશન અને અદભૂત આયોજન!
આ રેકોર્ડ હાંસલ કરવા માટે અદાણી સિમેન્ટે તેમના ખાસ બનાવેલા ECOMaxX M45 ગ્રેડ લો-કાર્બન કોંક્રિટનો ઉપયોગ કર્યો. આ કામગીરી 54 કલાક સુધી સતત ચાલુ રહી, જેમાં નીચેની બાબતોનું ધ્યાન રાખવામાં આવ્યું:

• 24,100 ક્યુબિક મીટર કોંક્રિટનો ઉપયોગ થયો.

• 26 રેડી-મિક્સ કોંક્રિટ (RMX) પ્લાન્ટ્સને સિંક્રોનાઇઝ્ડ લોજિસ્ટિક્સ નેટવર્કમાં જોડવામાં આવ્યા.

• 285 ટ્રાન્ઝિટ મિક્સર અને 600થી વધુ કુશળ કારીગરો અને ટેકનિકલ નિષ્ણાતોની ટીમે અવિરત કામ કર્યું.

આખા ઓપરેશનનું એટલું કાળજીપૂર્વક આયોજન કરવામાં આવ્યું હતું કે તાપમાનનું નિયંત્રણ જળવાઈ રહ્યું અને કોંક્રિટની મિશ્રણ સુસંગતતા પણ શ્રેષ્ઠ રહી.
 
ભક્તિ અને ટકાઉપણાનો સંગમ
અદાણી ગ્રુપના સિમેન્ટ બિઝનેસના CEO વિનોદ બાહેટીએ જણાવ્યું કે, "આ પ્રોજેક્ટ માત્ર વર્લ્ડ રેકોર્ડ બનાવવાનો નથી, પરંતુ ગુણવત્તા, ગતિ અને હેતુનું પ્રતીક છે. આ એક એવો સેતુ છે જે ભક્તિ અને આધુનિક માળખાને જોડે છે."

ECOMaxX કોંક્રિટનો ઉપયોગ કરીને પ્રોજેક્ટના કાર્બન ફૂટપ્રિન્ટમાં 60%નો ઘટાડો થયો છે, જે અદાણી સિમેન્ટની ગ્રીન કન્સ્ટ્રક્શન પ્રત્યેની પ્રતિબદ્ધતા દર્શાવે છે. આ કોંક્રિટમાં 66% જેટલું સપ્લીમેન્ટરી સિમેન્ટીશિયસ મટિરિયલ (SCM) છે, જે તેને પર્યાવરણને અનુકૂળ બનાવે છે.
 
2000 કરોડનો પ્રોજેક્ટ અને ભવ્ય ભવિષ્ય
60 એકરમાં ફેલાયેલું આ ઉમિયા ધામ મંદિર આશરે ₹2,000 કરોડના રોકાણનું પ્રતિનિધિત્વ કરે છે. 504 ફૂટ ઊંચા બનનારા આ મંદિરના પાયામાં 1,551 ધર્મ સ્તંભોને ટેકો આપશે. આ ફાઉન્ડેશન 450 ફૂટ x 400 ફૂટ x 8 ફૂટનું માપ ધરાવે છે, જે તેને ખરેખર વિશ્વકક્ષાનો પ્રોજેક્ટ બનાવે છે.

વિશ્વ ઉમિયા ફાઉન્ડેશનના પ્રમુખ આર.પી. પટેલે અદાણી સિમેન્ટની કુશળતાની પ્રશંસા કરતા કહ્યંબ કે, "આ સિદ્ધિ ભારતના સાંસ્કૃતિક અને ઇજનેરી વારસા માટે ગર્વની ક્ષણ છે."

અદાણી સિમેન્ટ અગાઉ વર્લ્ડ વન ટાવર અને ચેનાબ રેલ્વે બ્રિજ જેવા મોટા પ્રોજેક્ટ્સમાં પણ સામેલ રહી છે, અને હવે ઉમિયા ધામ મંદિર સાથે તેણે આધ્યાત્મિક માળખાકીય સુવિધાઓના નિર્માણમાં પણ પોતાની કુશળતા સાબિત કરી છે. આ સિદ્ધિ ભવિષ્યમાં ભારતમાં અનેક મોટા પ્રોજેક્ટ્સ માટે પ્રેરણારૂપ બનશે.

શું તમને લાગે છે કે આ પ્રકારની ટેકનોલોજી ભારતના અન્ય મોટા પ્રોજેક્ટ્સ માટે એક ગેમ-ચેન્જર સાબિત થશે?