નવી દિલ્હી: ભારતીય ક્રિકેટ જગતમાં રાજકીય હલચલ મચી ગઈ છે. ક્રિકબઝના એક અહેવાલ મુજબ, ભારતીય ક્રિકેટ કંટ્રોલ બોર્ડ (BCCI) ના આગામી પ્રમુખ કોણ હશે તેનો અંતિમ નિર્ણય લેવા માટે ૨૦ સપ્ટેમ્બરે કેન્દ્રીય ગૃહમંત્રી અમિતભાઈ શાહના નિવાસસ્થાને એક મહત્વપૂર્ણ બેઠક યોજાવાની છે. વર્તમાન પ્રમુખ રોજર બિન્નીનો કાર્યકાળ પૂરો થતા, હવે ઉપપ્રમુખ રાજીવ શુક્લા વચગાળાના અધ્યક્ષ તરીકે કાર્યભાર સંભાળી રહ્યા છે.
 
ચર્ચામાં કોના નામ?
આ ગુપ્ત બેઠકમાં આગામી પ્રમુખ પદ માટે કેટલાક મોટા નામો પર વિચારણા કરવામાં આવશે. ચર્ચામાં મુખ્યત્વે ભૂતપૂર્વ કેપ્ટન સૌરવ ગાંગુલી અને તેમના સાથી ખેલાડી હરભજન સિંહના નામ મોખરે છે. આ ઉપરાંત, કર્ણાટકના ભૂતપૂર્વ ટેસ્ટ ક્રિકેટર રઘુરામ ભટ અને ભૂતપૂર્વ ભારતીય વિકેટકીપર કિરણ મોરેનું નામ પણ સંભવિત ઉમેદવારોની યાદીમાં છે.

જોકે, શાસક ભાજપ રમતગમત સંસ્થાઓમાં સક્ષમ અને કુશળ ખેલાડીઓનું નેતૃત્વ સુનિશ્ચિત કરવાની નીતિ ધરાવે છે, જેના કારણે આ નિર્ણય વધુ મહત્વપૂર્ણ બની જાય છે.

જોકે, આગામી પ્રમુખના નામની સત્તાવાર જાહેરાત ૨૮ સપ્ટેમ્બરે યોજાનારી વાર્ષિક સામાન્ય સભા (AGM) માં કરવામાં આવશે.