ન્યુયોર્ક: યુ.એસ.ના ફર્સ્ટ લેડી (FLOTUS) મેલાનિયા ટ્રમ્પની ફેશન, ખાસ કરીને તેમની ટોપીઓ, હંમેશા ચર્ચામાં રહે છે. તાજેતરમાં બ્રિટન પ્રવાસ દરમિયાન અને આ પહેલા રાષ્ટ્રપતિના શપથ ગ્રહણ સમારોહમાં તેમણે પહેરેલી ટોપીઓએ ફરી એકવાર ચર્ચા જગાવી છે, અને સોશિયલ મીડિયા પર મીમ્સ અને અટકળોનું પૂર આવ્યું છે.

ટોપીઓનો રાજદ્વારી સંદેશ
બ્રિટન મુલાકાત દરમિયાન મેલાનિયાએ ડ્રામેટિક ગ્રેપ-પર્પલ ડિઓર ટોપી પહેરી હતી, જેનો આખો બ્રિમ નીચો હતો અને લગભગ તેમની આંખો છુપાઈ ગઈ હતી. આ પહેલા, રાષ્ટ્રપતિના શપથ ગ્રહણ સમારોહમાં પણ તેમણે અમેરિકન ડિઝાઇનર એડમ લિપ્પેસ દ્વારા બનાવેલી અને ન્યૂ યોર્કના એરિક જેવિટ્સ દ્વારા તૈયાર કરાયેલી વૂલ બોટર-સ્ટાઈલ ટોપી પહેરી હતી, જેણે તેમની આંખોને ઢાંકી દીધી હતી. તે સમયે, ડોનાલ્ડ ટ્રમ્પે તેમને ચુંબન કરવાનો પ્રયાસ કર્યો ત્યારે પણ ટોપી આડે આવી હતી.

આ બંને પ્રસંગોએ, મેલાનિયાની ટોપીએ તેમનો લુક રહસ્યમય બનાવ્યો હતો, પરંતુ તે એક નિવેદન પણ રજૂ કરતી હતી. તેમની ફેશન અને ટોપીઓની પસંદગી પરથી ઇન્ટરનેટ પર લોકો એવી અટકળો લગાવી રહ્યા છે કે શું આ ટોપીઓ ફક્ત ફેશન સ્ટેટમેન્ટ છે કે પછી તે કોઈ રાજકીય સંદેશ આપી રહી છે.

મેલાનિયા ટ્રમ્પની આ ટોપીઓ ફેશન જગતમાં અસામાન્ય રીતે ધ્યાન ખેંચી રહી છે અને ફેશન પ્રેમીઓથી લઈને રાજકીય નિરીક્ષકો સુધી દરેકના મનમાં કુતુહલ જગાડી રહી છે.