તલ્લિન, એસ્ટોનિયા : રશિયા અને નાટો વચ્ચેનો તણાવ ફરી એકવાર ચરમસીમાએ પહોંચ્યો છે. એસ્ટોનિયાએ દાવો કર્યો છે કે ત્રણ રશિયન મિગ-31 ફાઇટર જેટ 12 મિનિટ માટે તેની હવાઈ સીમામાં ગેરકાયદેસર રીતે પ્રવેશ્યા હતા. આ ઘટના બાદ એસ્ટોનિયાએ રશિયાને સીધી અને આકરા શબ્દોમાં ચેતવણી આપી છે કે આગલી વખતે પરિણામ ભયંકર હશે.
 
૧૨ મિનિટ વિરુદ્ધ ૧૭ સેકન્ડનો અલ્ટીમેટમ
એસ્ટોનિયન સંસદની વિદેશ બાબતો સમિતિના વડા માર્કો મિહકેલ્સનએ રશિયાને સ્પષ્ટપણે જણાવ્યું, "૧૨ મિનિટ વિરુદ્ધ ૧૭ સેકન્ડ. આગલી વખતે, અમે પણ એવું જ કરીશું - જો તમે સમજો છો." તેમનું આ નિવેદન 2015માં તુર્કી દ્વારા રશિયન જેટને તોડી પાડવાની ઘટનાનો સંદર્ભ આપે છે, જેમાં તુર્કીએ માત્ર 17 સેકન્ડની ચેતવણી બાદ જ કાર્યવાહી કરી હતી. એસ્ટોનિયાનો ઇશારો સ્પષ્ટ છે કે તેમની ધીરજ ખૂટી ગઈ છે.

આ ઘટના બાદ એસ્ટોનિયાએ નાટોને તાત્કાલિક કલમ ૪ હેઠળ બેઠક બોલાવવા માટે અપીલ કરી છે, જેમાં નાટોના ૩૨ સભ્ય દેશો સંભવિત પગલાં પર ચર્ચા કરશે. અમેરિકી રાષ્ટ્રપતિ ડોનાલ્ડ ટ્રમ્પે પણ આ પરિસ્થિતિ પર ચિંતા વ્યક્ત કરતાં કહ્યું, "મને તે ગમતું નથી. આનાથી મોટો સંઘર્ષ થઈ શકે છે."

જોકે, રશિયાએ આ આરોપોને ફગાવી દીધા છે અને કહ્યું છે કે તેમના જેટ્સ નિર્ધારિત ઉડાન પર હતા અને કોઈ પણ દેશની સીમાનું ઉલ્લંઘન કર્યું નથી. પરંતુ એસ્ટોનિયાની આ તાત્કાલિક અને આક્રમક ચેતવણીએ રશિયા અને નાટો વચ્ચે સંઘર્ષની શક્યતાને વધુ વધારી દીધી છે.