પટના, બિહાર:  બિહારનું રાજકારણ ફરી એકવાર ગરમાયું છે. લાલુ પ્રસાદ યાદવના મોટા પુત્ર તેજ પ્રતાપ યાદવે એક ચોંકાવનારી જાહેરાત કરી છે. તેમણે શ્રીમદ્ ભગવદ્ ગીતા અને ભગવાન શ્રીકૃષ્ણના શપથ લઈને કહ્યું છે કે તેઓ હવે ક્યારેય રાષ્ટ્રીય જનતા દળ (RJD) માં પાછા નહીં ફરે. આ નિવેદન તેમણે પોતાના પરિવાર અને પાર્ટીથી અલગ થયા બાદ આપ્યું છે, જેના કારણે રાજકીય વર્તુળોમાં હલચલ મચી ગઈ છે.
 
પારિવારિક સંબંધો અને રાજકારણ અલગ
મીડિયા સાથેની વાતચીતમાં તેજ પ્રતાપ યાદવે સ્પષ્ટ કર્યું કે તેઓ રાજકારણ અને પારિવારિક સંબંધોને અલગ રાખે છે. તેમણે કહ્યું, "મારા માતા-પિતા મારા માટે ભગવાન જેવા છે અને તેમનો સ્નેહ હંમેશા મારી સાથે રહેશે, પરંતુ પાર્ટી અને રાજકીય નિર્ણયો હું સંપૂર્ણ સ્વતંત્રતાથી લઈશ." આ નિવેદન એવા સમયે આવ્યું છે જ્યારે તેમના બહેન રોહિણી આચાર્યના બળવાખોર ટ્વિટ્સે પણ પાર્ટીમાં રાજકીય તણાવ વધાર્યો છે.
 
પોતાની પાર્ટીમાંથી ચૂંટણી લડવાની જાહેરાત
તેજ પ્રતાપે જણાવ્યું છે કે તેઓ હવે ફક્ત પોતાની પાર્ટી જનશક્તિ જનતા દળ માંથી જ ચૂંટણી લડશે. તેમણે મહુઆ વિધાનસભા બેઠક પરથી ચૂંટણી લડવાની જાહેરાત કરી છે, જ્યાં હાલમાં RJDના મુકેશ રોશન ધારાસભ્ય છે. તેમનું મુખ્ય ધ્યાન શિક્ષણ, સ્વાસ્થ્ય અને બેરોજગારી જેવા જનતાના મુદ્દાઓ પર રહેશે.
 
પક્ષમાંથી હકાલપટ્ટી અને કારણ
નોંધનીય છે કે તેજ પ્રતાપને છ મહિના પહેલા RJD માંથી છ વર્ષ માટે હાંકી કાઢવામાં આવ્યા હતા. આ હકાલપટ્ટી પાછળ તેમની કથિત ગર્લફ્રેન્ડ અનુષ્કા યાદવ સાથેના ફોટા અને અંગત જીવનને લગતા મુદ્દાઓને કારણભૂત ગણાવવામાં આવ્યા હતા. તેજ પ્રતાપે હવે આ સ્પષ્ટ કરી દીધું છે કે તેઓ RJDમાં પાછા નહીં ફરે અને પોતાની અલગ રાજકીય સફર ચાલુ રાખશે. 

આ ઘટના લાલુ પરિવારના આંતરિક વિવાદને ફરીથી સપાટી પર લાવી છે અને 2025ની બિહાર વિધાનસભા ચૂંટણી પહેલા RJD માટે એક મોટો પડકાર ઊભો થયો છે.