નવી દિલ્હી,: અમેરિકાના ટેક્સાસ રાજ્યમાં ભગવાન હનુમાનની 90 ફૂટ ઊંચી પ્રતિમાને લઈને એક મોટો વિવાદ ઊભો થયો છે. સુગર લેન્ડમાં શ્રી અષ્ટલક્ષ્મી મંદિરમાં સ્થાપિત થઈ રહેલી આ પ્રતિમા, જેને 'સ્ટેચ્યુ ઓફ ધ યુનિયન' નામ આપવામાં આવ્યું છે, તેના પર એક રિપબ્લિકન નેતાએ ગંભીર સવાલો ઉઠાવ્યા છે.

'ખ્રિસ્તી રાષ્ટ્ર'નો દાવો અને હિન્દુ વિરોધી નિવેદન
રિપબ્લિકન નેતા એલેક્ઝાન્ડર ડંકનએ સોશિયલ મીડિયા પ્લેટફોર્મ X પર પ્રતિમાનો એક વીડિયો શેર કરીને વિરોધ દર્શાવ્યો હતો. તેમણે કહ્યું કે, "આપણે ટેક્સાસમાં ખોટા હિન્દુ દેવતાની ખોટી પ્રતિમા કેમ સ્થાપિત કરવાની મંજૂરી આપી રહ્યા છીએ? આપણે એક ખ્રિસ્તી રાષ્ટ્ર છીએ." તેમણે બાઇબલનો ઉલ્લેખ કરીને મૂર્તિપૂજાનો પણ વિરોધ કર્યો.

હિન્દુ અમેરિકન ફાઉન્ડેશનની આકરી પ્રતિક્રિયા
ડંકનના આ નિવેદનથી ભારે હોબાળો મચ્યો છે. હિન્દુ અમેરિકન ફાઉન્ડેશન (HAF) એ તેમના નિવેદનને હિન્દુ વિરોધી અને ઉશ્કેરણીજનક ગણાવ્યું છે. HAF એ ટેક્સાસ રિપબ્લિકન પાર્ટીમાં લેખિત ફરિયાદ નોંધાવીને ડંકન સામે તાત્કાલિક કાર્યવાહીની માંગ કરી છે.

ઘણા ઇન્ટરનેટ યુઝર્સે પણ ડંકનની ટિપ્પણીની ટીકા કરી છે. તેમણે નેતાને અમેરિકાના બંધારણની યાદ અપાવી, જે દરેક નાગરિકને પોતાના ધર્મનું પાલન કરવાની સ્વતંત્રતા આપે છે. એક યુઝરે તો એમ પણ કહ્યું કે, "તમે હિન્દુ નથી, તેનો અર્થ એ નથી કે તે ખોટા છે. વેદ ખ્રિસ્તી ધર્મ કરતાં હજારો વર્ષ જૂના છે."

આ ઘટનાએ અમેરિકામાં ધાર્મિક સ્વતંત્રતા અને સહઅસ્તિત્વ પર નવી ચર્ચા ઊભી કરી છે.