અમદાવાદ: તહેવારોની સિઝન શરૂ થઈ ગઈ છે અને સાથે જ ફ્લિપકાર્ટ અને એમેઝોન જેવી ઈ-કોમર્સ વેબસાઈટ્સ પર મેગા સેલ પણ શરૂ થઈ ગયા છે. પેઈડ સભ્યો માટે 22 સપ્ટેમ્બરથી સેલ લાઈવ થઈ ગયો હતો અને હવે તે બધા માટે ખુલ્લો છે. આ સેલમાં ખરીદી કરતી વખતે જેટલા ઉત્સાહી ગ્રાહકો હોય છે, એટલા જ સક્રિય સાયબર ગુનેગારો પણ હોય છે. આ લુટારાઓ તમને ડિસ્કાઉન્ટના નામે છેતરી શકે છે. આ છેતરપિંડીથી બચવા માટે કેટલીક બાબતોનું ધ્યાન રાખવું અત્યંત જરૂરી છે. 
 
આ બાબતોનું ખાસ ધ્યાન રાખો:

1. માત્ર વિશ્વસનીય વેબસાઇટ પર જ ખરીદી કરો:
આજકાલ, AIની મદદથી મિનિટોમાં નકલી વેબસાઇટ્સ બનાવી શકાય છે જે અસલી જેવી જ દેખાય છે. સ્કેમર્સ આવી વેબસાઇટ્સનો ઉપયોગ કરીને તમારી અંગત વિગતો ચોરી શકે છે. તેથી, હંમેશા માત્ર જાણીતી અને વિશ્વસનીય વેબસાઇટ્સ પર જ ખરીદી કરો.

2. સાર્વજનિક Wi-Fi પર ખરીદી કરવાનું ટાળો:
જો તમે કોઈ કાફે, રેલવે સ્ટેશન અથવા એરપોર્ટના સાર્વજનિક Wi-Fi નો ઉપયોગ કરી રહ્યા છો, તો ઓનલાઇન ખરીદી કરવાનું ટાળો. આ નેટવર્ક્સ સુરક્ષિત નથી હોતા અને તેના દ્વારા થતા વ્યવહારો હેક થઈ શકે છે. સુરક્ષિત કનેક્શન (જેમ કે તમારું મોબાઇલ ડેટા) નો જ ઉપયોગ કરો.

3. સોશિયલ મીડિયાની જાહેરાતોથી લલચાશો નહીં:
સ્કેમર્સ સોશિયલ મીડિયા પર અવાસ્તવિક ડિસ્કાઉન્ટની જાહેરાતો આપીને લોકોને લલચાવે છે. આવી જાહેરાતો પર ક્લિક કરવાથી તમે કોઈ દૂષિત વેબસાઈટ પર પહોંચી શકો છો, જે તમારા ડિવાઇસમાં માલવેર ઇન્સ્ટોલ કરી શકે છે અથવા તમારી અંગત માહિતી ચોરી શકે છે.

4. અજાણ્યા લોકોની લિંક્સ ખોલશો નહીં:
તમને ઈમેલ અથવા મેસેજ દ્વારા મળતી શંકાસ્પદ લિંક્સ પર ક્લિક કરવાનું ટાળો. આ લિંક્સ ફિશિંગ કૌભાંડોનો ભાગ હોઈ શકે છે, જે તમારી બધી અંગત માહિતી હેકર્સને ટ્રાન્સફર કરી શકે છે.

ઓનલાઈન શોપિંગની મજા લેવા માટે આટલી સાવચેતી રાખવી ખૂબ જ જરૂરી છે.