નવી દિલ્હી :ઉત્તરપશ્ચિમ શ્રીલંકાના જંગલમાં સ્થિત એક મઠમાં કેબલ ટ્રેન પલટી જતાં એક ભારતીય સહિત સાત બૌદ્ધ સાધુઓના મોત થયા હતા. આ અકસ્માતમાં છ અન્ય લોકો પણ ઘાયલ થયા હતા. શ્રીલંકન પોલીસે ગુરુવારે આ અકસ્માતની જાહેરાત કરી હતી. આ ઘટના બુધવારે રાત્રે કોલંબોથી લગભગ 125 કિલોમીટર દૂર નિકાવેરતિયામાં સ્થિત એક પ્રખ્યાત બૌદ્ધ મઠના ઉયાના અરણ્ય સેનાસનાયા ખાતે બની હતી.

આ મઠ તેના ધ્યાન શિબિરો માટે પ્રખ્યાત છે અને વિશ્વભરના સાધકોને આકર્ષે છે. પોલીસે જણાવ્યું હતું કે, સાત મૃતક સાધુઓમાં એક ભારતીય, એક રશિયન અને એક રોમાનિયન હતો. તેમણે કહ્યું કે, ઘાયલોમાંથી ચારની હાલત ગંભીર છે. અહેવાલો અનુસાર કેબલ તૂટી ગયો, જેના કારણે ટ્રેન ખૂબ જ ઝડપે નીચે ઉતરી ગઈ, પાટા પરથી ઉતરી ગઈ અને પછી પલટી જતાં પહેલાં ઝાડ સાથે અથડાઈ.

કેબલ સંચાલિત ટ્રેન એવી ટ્રેન છે જેને મજબૂત લોખંડના કેબલ દ્વારા ખેંચવામાં આવે છે અથવા નિયંત્રિત કરવામાં આવે છે. ટ્રેનના કોચ એન્જિન દ્વારા સંચાલિત નથી, પરંતુ તેને ઉપર અથવા નીચે ખેંચવા માટે સ્ટીલ કેબલ અને મોટરાઇઝ્ડ પુલી સિસ્ટમનો ઉપયોગ કરવામાં આવે છે.

કેબલ સંચાલિત ટ્રેનો ખાસ કરીને ડુંગરાળ વિસ્તારો અને ઢોળાવમાં ઉપયોગી છે. ટ્રેનના કોચ પાટા પર મૂકવામાં આવે છે. એક મજબૂત સ્ટીલ દોરડું (કેબલ) એક છેડે જોડાયેલું હોય છે. આ કેબલ મોટર અને પુલી સિસ્ટમ સાથે જોડાયેલું હોય છે. એકવાર મોટર ચાલુ થઈ જાય, પછી તે કેબલ ખેંચે છે, અને ટ્રેન ધીમે-ધીમે ઉપર અથવા નીચે ઉતરે છે.

શ્રીલંકા ઉપરાંત કેબલ સંચાલિત ટ્રેનો ઘણા અન્ય દેશોમાં પણ કાર્યરત છે. તે સ્વિટ્ઝર્લૅન્ડ, ઑસ્ટ્રિયા અને જર્મનીના પર્વતીય વિસ્તારોમાં અત્યંત લોકપ્રિય છે. આ ટેકનોલોજી મુસાફરોને રોમાંચક અનુભવ આપે છે, પરંતુ સલામતીના ધોરણોને અવગણવાથી તે મોંઘુ પડી શકે છે.