નવી દિલ્હી: ભારતમાં રહીને અહીંની સંસ્કૃતિ, ભોજન અને બોલિવૂડ ગીતો પર ડાન્સ કરીને લાખો ફોલોઅર્સ મેળવનારી રશિયન સોશિયલ મીડિયા ઇન્ફ્લુઅન્સર ક્રિસ્ટીના (જે 'કોકો ઇન ઇન્ડિયા' તરીકે જાણીતી છે)એ દિલ્હીની ફોરેનર્સ રિજનલ રજિસ્ટ્રેશન ઓફિસ (FRRO) પર ગંભીર દુર્વ્યવહારનો આરોપ લગાવ્યો છે. તેના વીડિયો સોશિયલ મીડિયા પર વાયરલ થયા છે, જેમાં તે ભાવુક થઈને રડતી જોવા મળી રહી છે.

લગભગ 4.79 લાખ ફોલોઅર્સ ધરાવતી કોકોનો આરોપ છે કે FRROના સ્ટાફે તેનું માત્ર વિઝા સંબંધિત કામ જ ન કર્યું, પરંતુ તેની સાથે વ્યક્તિગત સવાલો પૂછીને તેને અપમાનિત પણ કરી.

મોબાઇલ ચેક, ચેટ્સ પર હાસ્ય અને અશ્લીલ સવાલો!
ક્રિસ્ટીનાનો આરોપ છે કે નવી દિલ્હીના આરકે પુરમમાં FRRO ના રૂમ 303 ના સ્ટાફે તેની સાથે આવું વર્તન કર્યું:
1.    મોબાઇલ ફોન છીનવી લીધો અને વિવિધ અંગત ચેટ્સ તપાસી.
2.    તેના સાથીદારને તે ચેટ્સ બતાવીને હાસ્ય ઉડાવ્યું.
3.    તેણીને તેના અંગત જીવન અને અલગ-અલગ હોટલોમાં રોકાણ વિશે પ્રશ્નો પૂછ્યા, જેનું કોઈ કારણ નહોતું.

ભાવુક થયેલી ક્રિસ્ટીનાએ તેના વીડિયોમાં કહ્યું કે, "મને કદાચ એવું લાગ્યું હશે કે હું આતંકવાદી કે ડ્રગ ડીલર છું, તેથી તેમને મારો ફોન તપાસવો પડ્યો હશે. હું રાષ્ટ્રીય સુરક્ષા સમજું છું."

પરંતુ, FRROની એક મહિલા કર્મચારીએ જ્યારે તેને પૂછ્યું કે 'જો તમે વસંત કુંજમાં રૂમ ભાડે લો છો, તો તમે અલગ અલગ હોટલોમાં કેમ જાઓ છો?', ત્યારે ક્રિસ્ટીના ભાવનાત્મક રીતે ભાંગી પડી.

તેણે પડકાર ફેંકતા કહ્યું: "હું સમજું છું કે તમે મને વેશ્યા માનો છો... જો તમે મને પુરાવા આપો કે હું કોઈ અન્ય વ્યક્તિ સાથે હોટલમાં રોકાઈ છું (મારા બોયફ્રેન્ડ સિવાય), તો હું માફી માંગીશ અને સ્વીકારીશ કે હું એક ઘૃણાસ્પદ સ્ત્રી, જૂઠી અને વેશ્યા છું. હું આ દેશ છોડીને જઈશ."

ક્રિસ્ટીનાએ FRROને પડકાર ફેંક્યો છે કે તેઓ ફોર્મ સી દ્વારા ચકાસણી કરે અને સાબિતી આપે કે તેના આરોપો સાચા છે. એક લોકપ્રિય વિદેશી વ્લોગર સાથેના આ કથિત ગેરવર્તનના કારણે ભારતમાં સરકારી કચેરીઓમાં વિદેશીઓ સાથેના વર્તન પર સવાલો ઊભા થયા છે.