લેહ: લદ્દાખમાં થયેલી હિંસા બાદ રાષ્ટ્રીય સુરક્ષા કાયદા (NSA) હેઠળ ધરપકડ કરાયેલા જાણીતા ક્લાઇમેટ એક્ટિવિસ્ટ સોનમ વાંગચુક પર લદ્દાખ પોલીસે કરેલા ગંભીર આક્ષેપોથી મોટો રાજકીય વિવાદ સર્જાયો છે. સોનમ વાંગચુકના સમર્થનમાં તેમની પત્ની ગીતાંજલિ જે. એંગ્મો મેદાનમાં ઉતર્યા છે અને તેમણે સરકાર તેમજ પોલીસના દાવાઓ સામે આકરા પ્રહારો કર્યા છે.

ગીતાંજલિએ પોલીસના એ દાવાને રદિયો આપ્યો છે કે સોનમ વાંગચુક પાકિસ્તાની ગુપ્તચર એજન્સી ISIના સંપર્કમાં હતા.

સવાલ નંબર 1: "શું કોઈ આ રીતે ISI એજન્ટ બને છે?"
સોનમ વાંગચુકની પાકિસ્તાન મુલાકાત પર સવાલ ઉઠાવવામાં આવતા ગીતાંજલિએ ગુસ્સે થઈને કહ્યું કે, "મારા પતિ માત્ર ક્લાઇમેટ સમિટમાં હાજરી આપવા માટે પાકિસ્તાન ગયા હતા. આ સમિટ સંયુક્ત રાષ્ટ્ર (UN) અને એક પાકિસ્તાની મીડિયા હાઉસ દ્વારા આયોજિત કરવામાં આવી હતી."

તેમણે સરકારને સીધો સવાલ પૂછ્યો: "જો કોઈ અફઘાનિસ્તાનથી બાંગ્લાદેશ સુધી પાણી પૂરું પાડતા ગ્લેશિયર્સની કોન્ફરન્સમાં હાજરી આપે, તો શું તે તેમને ISI એજન્ટ બનાવે? શું પુરાવા છે?" તેમણે ઉદાહરણ આપ્યું કે જો ભારત ચીન સાથે ક્રિકેટ રમે તો શું ખેલાડીઓ અને સંસ્થાઓને રાષ્ટ્રવિરોધી કહેવામાં આવશે?

સવાલ નંબર 2: "જે સરકારે સન્માન આપ્યું, શું ત્યારે તે આંધળી હતી?"
ગીતાંજલિએ લદ્દાખના ડીજીપીના નિવેદનનો પણ ઉધડો લીધો, જેમાં તેમણે કહ્યું હતું કે પોલીસે સોનમ વાંગચુકના સંપર્કમાં રહેલા એક પાકિસ્તાની હેન્ડલરની ધરપકડ કરી છે. તેમણે સરકાર પર સૌથી મોટો પ્રહાર કરતા કહ્યું:

"આ જ સરકારે એક સમયે સોનમ વાંગચુકનું સન્માન કર્યું હતું. તેમને તત્કાલીન ઊર્જા મંત્રી આરકે સિંહ તરફથી એવોર્ડ મળ્યો હતો. શું આ સરકાર ત્યારે આંધળી હતી?"

ગીતાંજલિએ દાવો કર્યો કે સોનમ વાંગચુકને ફસાવવા માટે એક નકલી વાર્તા ઊભી કરવામાં આવી રહી છે. તેમણે યાદ અપાવ્યું કે વાંગચુકે ચીનની સરહદ પર ભારતીય સેના દ્વારા 'ચાઇનીઝ ગોળીઓ' ખરીદવા અંગે સવાલ ઉઠાવ્યો હતો અને કહ્યું હતું કે આપણે ગોળીઓથી નહીં, પણ પાકીટથી (આર્થિક બહિષ્કારથી) ચીનનો સામનો કરવાની જરૂર છે. તેમણે પ્રશ્ન કર્યો કે આવો વ્યક્તિ રાષ્ટ્રવિરોધી કેવી રીતે હોઈ શકે?

તેમણે કહ્યું કે ગૃહ મંત્રાલયે આ બનાવટી આરોપો અંગે જવાબ આપવો પડશે. આ આકરા પ્રહારોથી સ્પષ્ટ છે કે સોનમ વાંગચુકની ધરપકડ બાદ રાજકીય માહોલ વધુ ગરમાયો છે.