તમિલનાડુની રાજધાની ચેન્નાઈમાં જન્મેલા 31 વર્ષના અરવિંદ શ્રીનિવાસ દેશના સૌથી યુવા અબજોપતિ બનીને ઇતિહાસ રચ્યો છે. પર્પ્લેક્સિટી એઆઈના સહ-સ્થાપક અને CEO, અરવિંદની વર્તમાન કુલ સંપત્તિ રૂપિયા 21,190 કરોડ છે, જેના કારણે તેઓ M3M હુરુન ઈન્ડિયા રિચ લિસ્ટ 2025માં શાનદાર પ્રવેશ કરી શક્યા છે.

અરવિંદની કંપની, પર્પ્લેક્સિટી AI, એક વાતચીત સર્ચ એન્જિન છે જે ગૂગલના જેમિની અને ઓપનએઆઈના ચેટજીપીટીને પડકાર આપી રહી છે. વધુમાં, કંપનીએ તાજેતરના વર્ષોમાં ઝડપથી વિકાસ કર્યો છે.

ચેન્નાઈમાં જન્મેલા અરવિંદ વિશે હુરુન રિપોર્ટમાં જણાવાયું છે કે M3M હુરુન ઈન્ડિયા રિચ લિસ્ટ 2025 ભારતની સેવા-કેન્દ્રિત ભૂતકાળથી ડીપ-ટેક, પ્રોડક્ટ-આધારિત પાવરહાઉસ બનવાની સફરને પ્રતિબિંબિત કરે છે. પરપ્લેક્સિટીના સહ-સ્થાપક 31 વર્ષીય અરવિંદ શ્રીનિવાસનું સૌથી યુવા અબજોપતિ તરીકે પદાર્પણ આ પરિવર્તનને રેખાંકિત કરે છે. તેમની સંપત્તિ વૈશ્વિક સ્તરે સ્પર્ધા કરતા એક ક્રાંતિકારી AI મોડેલના નિર્માણમાંથી ઉદ્ભવે છે.

ઝેપ્ટોના સ્થાપક 22 વર્ષીય કૈવલ્ય વોહરાની કુલ સંપત્તિ ₹4,480 કરોડ, 23 વર્ષીય અદિત પાલિચાની કુલ સંપત્તિ ₹5,380 કરોડ, પ્રિઝમ (OYO)ના 31 વર્ષીય રિતેશ અગ્રવાલની કુલ સંપત્તિ ₹14,400 કરોડ, SG ફિનસર્વના 26 વર્ષીય રોહન ગુપ્તાની કુલ સંપત્તિ ₹1,140 કરોડ, BharatPeના 27 વર્ષીય શાશ્વત નાકરાણીની કુલ સંપત્તિ ₹1,340 કરોડ અને TAC સિક્યોરિટીઝના 30 વર્ષીય ત્રિશનીત અરોરા, ₹1,820 કરોડની કુલ સંપત્તિ સાથે હુરુન ઇન્ડિયા રિચ લિસ્ટમાં સ્થાન મેળવ્યું છે.

અરવિંદ શ્રીનિવાસ ભારતીય મૂળના એન્જિનિયર અને ઉદ્યોગસાહસિક છે જે AI-સંચાલિત સર્ચ એન્જિન, Perplexity ના CEO અને સહ-સ્થાપક છે. અરવિંદે IIT મદ્રાસમાં અભ્યાસ કર્યો, જ્યાં તેમણે ઇલેક્ટ્રિકલ એન્જિનિયરિંગમાં બે ડિગ્રી મેળવી, અને બાદમાં યુનિવર્સિટી ઓફ કેલિફોર્નિયા, બર્કલેમાંથી કમ્પ્યુટર સાયન્સમાં પીએચડી પૂર્ણ કરી. પોતાની કંપની શરૂ કરતા પહેલા, તેમણે OpenAI, Google અને DeepMind સહિત વિશ્વની કેટલીક ટોચની AI કંપનીઓમાં કામ કર્યું, જેનાથી તેમને પોતાનો વ્યવસાય શરૂ કરવાનો અનુભવ મળ્યો.