મમ્મી-પપ્પા કાયમ ઝગડે છે.... જોડિયા બાળકોની વાત સાંભળીને ન્યાયાધીશ ભાવુક બન્યા
ન્યાયાધીશે તેમને બોર્ડિંગ સ્કૂલમાં મોકલવાનો નિર્ણય સંભળાવ્યો
ચંદીગઢ, તા.૪: પંજાબ અને હરિયાણા હાઈકોર્ટે ચુકાદો આપ્યો છે કે ગુડગાંવના એક દંપતી વચ્ચે ચાલી રહેલા વિવાદથી દુઃખી થયેલી જોડિયા છોકરીઓને ર્બોડિંગ સ્કૂલમાં મોકલવી જોઈએ. ન્યાયાધીશ સંજય વશિષ્ઠે તેમના ચેમ્બરમાં છોકરીઓ સાથે વાત કર્યા પછી અને તેમની ભાવનાત્મક સ્થિતિને સમજ્યા પછી આ નિર્ણય લીધો. તેમણે ચુકાદો આપ્યો કે છોકરીઓને ગુડગાંવની ર્બોડિંગ સ્કૂલમાં મોકલવી જોઈએ, જેનો ખર્ચ બંને માતાપિતા ઉઠાવશે.
હકીકતમાં, ગુડગાંવના એક દંપતીનો વૈવાહિક વિવાદ હાઈકોર્ટમાં ચાલી રહ્યો છે. તેમની જોડિયા છોકરીઓએ પણ સુનાવણીમાં હાજરી આપી હતી. વાતચીત દરમિયાન, બંનેએ તેમના માતાપિતાના વર્તનનું વર્ણન કર્યું. કોર્ટના રેકોર્ડ મુજબ, છોકરીઓએ તેમના માતાપિતાને અનેક વખત લડતા અને ઝઘડા કરતા જોયા છે. તેઓએ જણાવ્યું કે તેમના પિતા કામમાં વ્યસ્ત હોય છે અને મોડા ઘરે પાછા ફરે છે, જ્યારે તેમની માતા આખો દિવસ ઘરેથી કામ કરે છે. આનાથી છોકરીઓ એકલતા અનુભવે છે.
કોર્ટે જિલ્લા વહીવટીતંત્ર અને શાળા મેનેજમેન્ટને આ પ્રક્રિયામાં સહકાર આપવાનો નિર્દેશ આપ્યો. કોર્ટે જણાવ્યું કે પ્રવેશ પ્રક્રિયા શરૂ થાય તે પહેલાં માતા પિતાની સંમતિથી છોકરીઓને બે દિવસ પોતાની સાથે રાખી શકે છે. બાળકોની મુલાકાત લેવાના અધિકાર અંગે અલગ નિર્ણય લેવામાં આવશે. આ મામલે આગામી સુનાવણી ૧૫મી ઓક્ટોબરે થશે. કોર્ટે એમ પણ કહ્યું કે છોકરીઓના હિતો સર્વોપરી છે. માતાપિતાના મતભેદો તેમના માનસિક વિકાસને અસર ન કરે. ન્યાયાધીશ સંજય વશિષ્ઠે ટિપ્પણી કરી કે છોકરીઓની નિર્દોષતા અને ભાવનાત્મક સ્થિરતા જાળવવી એ કોર્ટની પ્રાથમિક ચિંતા છે.
(10:03 AM IST)
છેલ્લા 8 દિવસમાં સૌથી લોકપ્રિય 
