નવી દિલ્હી :સુપ્રીમ કોર્ટમાં એક વકીલે કોર્ટ રૂમ 1માં પ્રવેશ કર્યો અને કથિત રીતે ભારતના મુખ્ય ન્યાયાધીશ ( CJI ) બી.આર. ગવઈ પર હુમલો કરવાના ઇરાદે તેમના પર જૂતું ફેંકવાનો પ્રયાસ કર્યો.

જોકે, આ દરમિયાન ત્યાં હાજર સુરક્ષાકર્મીઓએ તેને પકડી લીધો અને કોર્ટ રૂમમાંથી બહાર લઈ ગયા હતા. બાદમાં કોર્ટની સુનાવણી નિયમિત રીતે શરૂ થઈ શકી. આ ઘટનાની SCAORAએ નિંદા કરી છે. એસોસિએશને આ ઘટના પર ઊંડો દુઃખ અને અસ્વીકૃતિ વ્યક્ત કરી છે. આ ઉપરાંત બાર કાઉન્સિલ ઓફ ઇન્ડિયાએ તાત્કાલિક અસરથી એડવોકેટને પ્રેક્ટિસ કરવાથી સસ્પેન્ડ કરી દીધો છે.

લાઇવ લૉના રિપોર્ટ અનુસાર, સુપ્રીમ કોર્ટ એડવોકેટ્સ-ઓન-રેકોર્ડ એસોસિએશન (SCAORA)એ સર્વસંમતિથી એક વકીલના તાજેતરના કૃત્ય પર પોતાનું ઊંડું દુઃખ અને અસ્વીકૃતિ વ્યક્ત કરી છે. આ વકીલે અસંયમિત હાવભાવથી ભારતના માનનીય મુખ્ય ન્યાયાધીશ અને તેમના સાથી ન્યાયાધીશોના પદ અને અધિકારનું અનાદર કરવાનો પ્રયાસ કર્યો.

એક પત્રમાં જણાવાયું કે આ વ્યવહાર કાનૂની વ્યવસાયની ગરિમાની વિરુદ્ધ છે અને મર્યાદા, શિસ્ત અને સંસ્થાકીય અખંડિતતાના બંધારણીય મૂલ્યોની વિરુદ્ધ છે. માનનીય સર્વોચ્ચ ન્યાયાલયના કોઈ કાર્યરત ન્યાયાધીશને બદનામ કરવાનો કોઈપણ પ્રયાસ અથવા તેમની વિરુદ્ધ કોઈ વ્યક્તિગત કૃત્ય/અભિવ્યક્તિ ન્યાયપાલિકાની સ્વતંત્રતા પર સીધો હુમલો છે અને ન્યાય વ્યવસ્થામાં જનતાના વિશ્વાસને નબળો પાડે છે.

સુપ્રીમ કોર્ટમાં CJI પર હુમલાનો પ્રયાસ કરનાર વ્યક્તિ અંગે ચીફ જસ્ટિસ બી.આર. ગવઈએ કહ્યું કે આ બાબતો મને પ્રભાવિત કરતી નથી.