બોગોટા/વોશિગ્‍ટનઃ કેરેબિયન સમુદ્રના દક્ષિણ ભાગમાં શંકાસ્‍પદ ડ્રગ તસ્‍કરોના જહાજો પર અમેરિકા દ્વારા કરવામાં આવેલા જીવલેણ હુમલાઓ બાદ કોલંબિયા અને યુનાઇટેડ સ્‍ટેટ્‍સ વચ્‍ચે ગંભીર રાજદ્વારી સંકટ પેદા થયો છે. કોલંબિયાના રાષ્ટ્રપતિ ગુસ્‍તાવ પેટ્રોએ આ કાર્યવાહીની આકરી નિદા કરી છે અને તેને હત્‍યા તથા ખુલ્‍લો અત્‍યાચાર ગણાવી છે.

રાષ્ટ્રપતિ ગુસ્‍તાવ પેટ્રોએ બુધવારે (સ્‍થાનિક સમય મુજબ) એક નિવેદન આપ્‍યું હતું કે અમેરિકા દ્વારા તાજેતરમાં નિશાન બનાવવામાં આવેલું જહાજ વેનેઝુએલાનું નહીં, પરંતુ કોલંબિયાનું હતું અને તેમાં કોલંબિયાના નાગરિકો સવાર હતા. પેટ્રોએ સ્‍પષ્ટપણે કહ્યું અહીં દાણચોરી સામે નહીં, પરંતુ તેલ માટેનું યુદ્ધ ચાલી રહ્યું છે અને દુનિયાએ તેને રોકવું જોઈએ. તેઓએ એવો પણ આક્ષેપ કર્યો કે આ જહાજમાં નાર્કો-આતંકવાદીઓ નહોતા, પરંતુ ગરીબ કેરેબિયન યુવાનો હતા જેઓ ગરીબીમાંથી છૂટકારો મેળવવા માંગતા હતા. આ હુમલામાં અત્‍યાર સુધીમાં ઓછામાં ઓછા ૨૧ (એકવીસ) લોકોના મોત થયા હોવાના અહેવાલ છે.

વ્‍હાઇટ હાઉસે રાષ્ટ્રપતિ પેટ્રોના દાવાઓને સખતપણે નકારી કાઢ્‍યા છે. વ્‍હાઇટ હાઉસના એક અધિકારીએ જણાવ્‍યું કે અમેરિકા અને કોલંબિયાના લોકો માટે એક મજબૂત, સમૃદ્ધ ભવિષ્‍યના નિર્માણ માટે ઉત્‍પાદક સંવાદ પર પાછા ફરી શકાય તે માટે યુનાઇટેડ સ્‍ટેટ્‍સ રાષ્ટ્રપતિ પેટ્રો દ્વારા તેમના પાયાવિહોણા અને નિદનીય નિવેદનને જાહેરમાં પાછું ખેંચવાની રાહ જોઈ રહ્યું છે. વ્‍હાઇટ હાઉસે ભારપૂર્વક જણાવ્‍યું કે નીતિગત મતભેદો હોવા છતાં, કોલંબિયા એક આવશ્‍યક વ્‍યૂહાત્‍મક ભાગીદાર છે.

 માનવાધિકાર દેખરેખ સંસ્‍થા (હ્યુમન રાઈટ વોચ): માનવાધિકાર દેખરેખ સંસ્‍થા સહિતના કાયદાકીય નિષ્‍ણાતોએ આ હુમલાઓની કાયદેસરતા પર સવાલ ઉઠાવ્‍યા છે અને તેને ૅઅદાલત બહારની હત્‍યાઓ ગણાવી છે. તેમણે પૂછ્‍યું છે કે, જ્‍યારે તમે જહાજને રોકીને ક્રૂની ધરપકડ કરી શકો છો, તો પછી મિસાઇલથી હુમલો શા માટે?

અમેરિકન અધિકારીઓની કબૂલાતઃ ન્‍યૂ યોર્ક ટાઇમ્‍સના અહેવાલ મુજબ, બે અમેરિકન અધિકારીઓએ નામ ન આપવાની શરતે કબૂલ્‍યું હતું કે અમેરિકા દ્વારા તાજેતરમાં નષ્ટ કરાયેલા ઓછામાં ઓછા એક જહાજ પર કોલંબિયન નાગરિકો સવાર હતા.

પેટ્રોની માંગઃ પેટ્રોએ સંયુક્‍ત રાષ્ટ્ર મહાસભામાં પણ આ મુદ્દો ઉઠાવ્‍યો હતો અને આ હુમલાઓનો આદેશ આપનારા વરિષ્ઠ અમેરિકી અધિકારીઓ, જેમાં રાષ્ટ્રપતિ ટ્રમ્‍પનો પણ સમાવેશ થાય છે, તેમની સામે ગુનાહિત કાર્યવાહીૅ શરૂ કરવાની માંગ કરી હતી.