ટેનેસી: અમેરિકાના ટેનેસી રાજ્યમાં આજે શુક્રવારે એક સૈન્ય વિસ્ફોટકોના ઉત્પાદન પ્લાન્ટમાં જોરદાર બ્લાસ્ટ થવાથી અનેક લોકોનાં મોત થયા હોવાના અને અન્ય કેટલાક લોકો લાપતા હોવાના સમાચાર મળી રહ્યા છે. સ્થાનિક અધિકારીઓએ આ ઘટનાની પુષ્ટિ કરી છે.
 આ ભયાનક વિસ્ફોટ નાશવિલેથી લગભગ ૯૭97 કિલોમીટર દક્ષિણ-પશ્ચિમમાં બક્સનોર્ટ નજીક હિકમેન કાઉન્ટીમાં આવેલી એક્યુરેટ એનર્જેટિક સિસ્ટમ્સ નામની કંપનીના પ્લાન્ટમાં થયો હતો. આ કંપની સૈન્ય અને કોમર્શિયલ હેતુઓ માટે વિસ્ફોટકો બનાવે છે અને તેનું પરીક્ષણ કરે છે.
 હમ્ફ્રીઝ કાઉન્ટીના શેરિફ ક્રિસ ડેવિસે પ્રેસ કોન્ફરન્સમાં જણાવ્યું હતું કે, "અમે પુષ્ટિ કરી શકીએ છીએ કે કેટલાક લોકો મૃત્યુ પામ્યા છે અને હાલમાં ઘણા લોકો લાપતા છે." તેમણે પરિવારોની ભાવનાઓનું ધ્યાન રાખવાનું જણાવ્યું હતું.
 બ્લાસ્ટ એટલો શક્તિશાળી હતો કે તેના આંચકા પ્લાન્ટથી માઇલો દૂર રહેતા લોકોને પણ અનુભવાયા હતા. નજીકના લોબેલવિલે ના રહેવાસીઓએ જણાવ્યું હતું કે તેમના ઘરો ધ્રૂજી ઉઠ્યા હતા.
 પ્રાથમિક વિસ્ફોટ બાદ પણ સતત ત્યાર પછીના વિસ્ફોટો થતા હોવાને કારણે શરૂઆતમાં બચાવ ટીમો માટે પ્લાન્ટની અંદર પ્રવેશવું મુશ્કેલ બન્યું હતું. હિકમેન કાઉન્ટીના એડવાન્સ્ડ  ઇએમટી ડેવિડ સ્ટુઅર્ટે જણાવ્યું હતું કે ચાલુ ધડાકાઓને કારણે તેઓ ઘટનાસ્થળમાં પ્રવેશી શક્યા ન હતા.
 વિડિયો ફૂટેજમાં ઘટનાસ્થળે ધુમાડો અને આગની જ્વાળાઓ જોવા મળી રહી છે, જ્યારે કાટમાળ અને ક્ષતિગ્રસ્ત વાહનો પણ વેરવિખેર પડ્યા છે. હવાઈ દ્રશ્યોમાં પ્લાન્ટની એક ઇમારત સંપૂર્ણપણે ધ્વસ્ત થઈ ગયેલી જોવા મળી હતી.
 વિસ્ફોટનું કારણ હજુ સુધી જાણી શકાયું નથી, અને શેરિફ ડેવિસે જણાવ્યું કે તપાસમાં ઘણા દિવસો લાગી શકે છે.
ટેનેસી ઇમરજન્સી મેનેજમેન્ટ એજન્સીએ ઇજાઓ થઈ હોવાની પુષ્ટિ કરી છે, પરંતુ આરોગ્ય વિભાગ દ્વારા સંખ્યાની પુષ્ટિ ન થાય ત્યાં સુધી કોઈ ચોક્કસ આંકડો જાહેર કરવામાં આવ્યો નથી. અધિકારીઓએ લોકોને વિસ્તારથી દૂર રહેવા વિનંતી કરી છે, જેથી બચાવકર્તાઓને તેમનું કાર્ય કરવામાં સરળતા રહે.
આ ઘટનાથી સ્થાનિક સમુદાયમાં શોકની લાગણી છવાઈ ગઈ છે, અને મેકઇવાન ના મેયર બ્રેડ રચફોર્ડે તેને "અમારા સમુદાય માટે એક દુર્ઘટના" ગણાવી છે.