પટણા: બિહાર વિધાનસભા ચૂંટણી 2025 માં રાજકીય ગરમાવો વધી ગયો છે. આ વખતે ભાજપ-જેડીયુના નેતૃત્વ હેઠળના એનડીએ અને આરજેડીના મહાગઠબંધન સામે અસાદુદ્દીન ઓવૈસીની પાર્ટી AIMIM (ઓલ ઇન્ડિયા મજલિસ-એ-ઇત્તેહાદુલ મુસલમીન) એક મજબૂત ત્રીજા મોરચા તરીકે ઊભરી રહી છે.
AIMIM એ બિહાર ચૂંટણી માટે પોતાના ૨૬ ઉમેદવારોની પહેલી યાદી જાહેર કરીને રાજકીય મોરચે હલચલ મચાવી દીધી છે. સૌથી મોટી વાત એ છે કે પાર્ટીએ આ વખતે ૧૦૦ બેઠકો પર ચૂંટણી લડવાની જાહેરાત કરી છે, જે ૨૦૨૦ ની ચૂંટણીમાં લડેલી ૨૦ બેઠકો કરતાં પાંચ ગણી વધારે છે.
AIMIM ના પ્રદેશ પ્રમુખ અખ્તરુલ ઇમાને સ્પષ્ટતા કરી કે, "AIMIM બિહારે મહાગઠબંધનમાં જોડાવા માટે ઘણા પ્રયાસો કર્યા હતા. અમે આરજેડી સુપ્રીમો લાલુ પ્રસાદ યાદવ સાથે પણ વાત કરવાનો પ્રયાસ કર્યો, જેથી ધર્મનિરપેક્ષ મતોનું વિભાજન ન થાય. જોકે, દર વખતે અમારું અપમાન કરવામાં આવ્યું અને કોઈ જવાબ મળ્યો નહીં. આના પરિણામે, અમારે ત્રીજું જોડાણ બનાવવું પડ્યું છે."
ઓવૈસીની પાર્ટીના આ મોટા નિર્ણયથી એવું માનવામાં આવી રહ્યું છે કે, મુસ્લિમ બહુલ વિસ્તારોમાં AIMIM મહાગઠબંધનના મતો તોડીને તેનો ખેલ બગાડી શકે છે, જેનાથી સીધો ફાયદો એનડીએને થઈ શકે છે.
AIMIM કિશનગંજ, પૂર્ણિયા, કટિહાર અને અરરિયાના ચાર મુખ્ય જિલ્લાઓ ઉપરાંત ગયા, મોતિહારી, નવાદા, જમુઈ, ભાગલપુર, સિવાન, દરભંગા, સમસ્તીપુર, સીતામઢી, મધુબની, વૈશાલી અને ગોપાલગંજ જેવા અનેક મહત્વપૂર્ણ જિલ્લાઓની ઘણી બેઠકો પર ઉમેદવારો ઉભા કરશે.
જાહેર કરાયેલા ૨૬ ઉમેદવારોની બેઠકોની યાદી:
    કિશનગંજ: બહાદુરગંજ, ઠાકુરગંજ, કોચાધામ અને કિશનગંજ
    પૂર્ણિયા: આમરો, બૈસી અને કસ્બા
    કટિહાર: બલરામપુર, પ્રાણપુર, મણિહારી, બરારી અને કડવા
    અરરિયા: જોકીહાટ અને અરરિયા
    ગયા: શેરઘાટી અને બેલા
    મોતિહારી: ઢાકા અને નરકટિયા
    નવાદા: નવાદા શહેર
    જમુઈ: સિકન્દ્રા
    ભાગલપુર: ભાગલપુર અને નાથનગર
    સિવાન: સિવાન
    દરભંગા: જલે, કીઓટી, દરભંગા ગ્રામીણ અને ગૌરા બૌરામ
    સમસ્તીપુર: કલ્યાણપુર
    સીતામઢી: બાજપટ્ટી
    મધુબની: બિસ્ફી
    વૈશાલી: મહુઆ
    ગોપાલગંજ: ગોપાલગંજ
AIMIM નો આ આક્રમક પ્રવેશ બિહારની ચૂંટણીને ત્રિકોણીય જંગમાં ફેરવીને તેના પરિણામો પર નિર્ણાયક અસર કરી શકે છે.