ભાજપના આઈટી સેલના વડા અમિત માલવિયાએ કોંગ્રેસ નેતા રાહુલ ગાંધીની દક્ષિણ અમેરિકાની અંગત યાત્રાને લઈને આકરા પ્રહારો કર્યા છે. તેમણે રાહુલ ગાંધીને 'લાપતા નેતા' ગણાવ્યા અને સવાલ કર્યો કે તેઓ શા માટે આટલી ગુપ્તતા જાળવી રહ્યા છે. બિહાર વિધાનસભાની ચૂંટણી જાહેર થઈ ગઈ હોવાથી, માલવિયાએ કટાક્ષમાં રાહુલ ગાંધીને તાત્કાલિક ભારત પાછા ફરવાની સલાહ આપી છે.

વિગતવાર જોઈએ તો કોંગ્રેસના નેતા રાહુલ ગાંધીની દક્ષિણ અમેરિકાની ખાનગી યાત્રા ફરી એકવાર વિવાદના કેન્દ્રમાં આવી છે. ભારતીય જનતા પાર્ટીએ આ પ્રવાસને લઈને રાહુલ ગાંધી પર જોરદાર પ્રહાર કર્યા છે અને તેમની ગેરહાજરી પર સવાલો ઉઠાવ્યા છે.

ભાજપના આઈટી સેલના વડા અમિત માલવિયાએ એક્સ (અગાઉનું ટ્વિટર) પર એક પછી એક પોસ્ટ કરીને રાહુલ ગાંધી પર નિશાન સાધ્યું હતું. માલવિયાએ જણાવ્યું હતું કે, "હવે ૧૫ દિવસથી વધુ સમય થઈ ગયો છે અને તેમની મુસાફરીના વાસ્તવિક હેતુ પરથી ધ્યાન હટાવવા માટે બનાવેલા કેટલાક વીડિયો સિવાય સંપૂર્ણ મૌન છે."

તેમણે રાહુલ ગાંધીના અન્ય કાર્યક્રમો પર પણ સવાલ ઉઠાવતા પૂછ્યું કે, "રાહુલ ગાંધી આખરે ક્યાં છે અને દક્ષિણ અમેરિકામાં શું કરી રહ્યા છે? આટલી ગુપ્તતા શા માટે?"

અગાઉ, શનિવારે પણ માલવિયાએ તેમના એક્સ હેન્ડલ પર કટાક્ષ કર્યો હતો. તેમણે લખ્યું, "જો રાહુલ ગાંધી કોલંબિયામાં કોફી બનાવતા શીખી ગયા હોય અને રજાઓ માણી રહ્યા હોય, તો તેમણે ભારત પાછા ફરવું જોઈએ. બિહાર ચૂંટણીની જાહેરાત થઈ ચૂકી છે અને એક મહિનાથી પણ ઓછા સમયમાં મતદાન શરૂ થઈ જશે.

ડિજિટલ મીડિયા રિપોર્ટ્સ અને અન્ય પ્લેટફોર્મ્સ પર પણ રાહુલ ગાંધીની આ યાત્રા અંગે ભાજપની આક્રમકતા જોવા મળી રહી છે. ભાજપ સાંસદ નિશિકાંત દુબેએ પણ રાહુલ ગાંધીના છેલ્લા દસ વર્ષના વિદેશ પ્રવાસોની તપાસની માંગ કરી હતી. 

મીડિયા અહેવાલો મુજબ, રાહુલ ગાંધીએ કોલંબિયામાં ભારતીય લોકશાહી અને વર્તમાન સરકાર પર કેટલીક ટિપ્પણીઓ પણ કરી છે, જેના કારણે ભાજપ તેમને વિદેશની ધરતી પર ભારતનું અપમાન કરવાનો આરોપ લગાવી રહી છે. કોંગ્રેસ પાર્ટીએ આ યાત્રાને 'ખાનગી' ગણાવી છે અને આ વખતે અન્ય વિદેશ પ્રવાસોની જેમ વધુ પ્રચાર કર્યો નથી.