સાઉથ કેરોલિના તા.૧૩: અમેરિકાના સાઉથ કેરોલિનામાં એક ભીડભાડવાળા બારમાં ગોળીબાર થયાના અહેવાલો છે. અત્‍યાર સુધીમાં ચાર લોકોના મોત થયા છે, જ્‍યારે ૨૦ થી વધુ ઘાયલ થયા છે. રવિવારે વહેલી સવારે સેન્‍ટ હેલેનામાં વિલીજ બાર એન્‍ડ ગ્રીલમાં ફાયરિગ થયું હતું. એક પોલીસ અધિકારીએ જણાવ્‍યું હતું કે, જ્‍યારે અમારી ટીમ ઘટનાસ્‍થળે પહોંચી ત્‍યારે ત્‍યાં ભારે ભીડ હતી. ફાયરિગમાં અનેક લોકો ઈજાગ્રસ્‍ત થયા છે. બચવા માટે લોકો નજીકની દુકાનો અને ઘરોમાં દોડી ગયા હતા.

પોલીસે એક નિવેદન જાહેર કરીને કહ્યું હતું કે, આ દરેક માટે ખૂબ જ દુઃખદ અને મુશ્‍કેલ ઘટના છે. અમે તપાસ કરતી વખતે ધીરજ રાખવા વિનંતી કરીએ છીએ. અમારા વિચારો બધા પીડિતો અને તેમના પ્રિયજનો સાથે છે.

અધિકારીઓએ જણાવ્‍યું હતું કે રવિવારે વહેલી સવારે સેન્‍ટ હેલેના ટાપુ પર વિલીજ બાર એન્‍ડ ગ્રિલમાં ગોળીબાર થયો હતો. તેમણે અહેવાલ આપ્‍યો હતો કે જ્‍યારે શેરિફના સહાયક ઘટનાસ્‍થળે પહોંચ્‍યા ત્‍યારે મોટી ભીડ હાજર હતી અને તેમને ઘણા લોકો ગોળીબારથી ઘાયલ જોવા મળ્‍યા હતા.

બ્‍યૂફોર્ટ કાઉન્‍ટી શેરિફ ઓફિસે સોશિયલ મીડિયા પ્‍લેટફોર્મ X પર એક નિવેદનમાં જણાવ્‍યું હતું કે, ઘણા લોકો ફાયરિગથી બચવા માટે નજીકના મથકો અને મિલકતોમાં દોડી ગયા હતા. નિવેદનમાં ઉમેર્યું હતું કે, આ દરેક માટે એક દુઃખદ ઘટના છે. અમે આ ઘટનાની તપાસ ચાલુ રાખતા ધીરજ રાખવા વિનંતી કરીએ છીએ. અમારા વિચારો બધા પીડિતો અને તેમના પ્રિયજનો સાથે છે.

ઘટનાસ્‍થળે ચાર લોકો મૃત હાલતમાં મળી આવ્‍યા હતા અને ઓછામાં ઓછા ૨૦ અન્‍ય ઘાયલ થયા હતા. ઘાયલોમાંથી ચારની હાલત ગંભીર છે અને તેમને વિસ્‍તારની હોસ્‍પિટલોમાં દાખલ કરવામાં આવ્‍યા છે. પીડિતોની ઓળખ જાહેર કરવામાં આવી નથી. પોલીસે કહ્યું કે તેઓ હુમલા પાછળના હેતુની પણ તપાસ કરી રહ્યા છે. હજુ સુધી કોઈ ધરપકડ કરવામાં આવી નથી.