નવી દિલ્હી, ૧૬ ઑક્ટોબર, ૨૦૨૫ : શ્રીલંકાના પ્રધાનમંત્રી હરિની અમરાસૂર્યા ગુરુવારે બે દિવસની સત્તાવાર મુલાકાતે ભારત પહોંચ્યા છે, અને આ તેમની પ્રધાનમંત્રી તરીકેની ભારતની પ્રથમ મુલાકાત છે! ૧૮ ઓક્ટોબર સુધી ચાલનારા આ મહત્વના પ્રવાસ દરમિયાન, પીએમ અમરાસૂર્યા માત્ર રાજકીય નેતાઓ સાથે મુખ્ય દ્વિપક્ષીય મુદ્દાઓ પર ચર્ચા કરીને સહયોગ મજબૂત કરવાના નથી, પરંતુ તેઓ એકદમ અનોખા એજન્ડા પર પણ ધ્યાન કેન્દ્રિત કરવાના છે.

શિક્ષણ અને ટેકનોલોજી પર ખાસ નજર:
ખાસ વાત એ છે કે, પીએમ અમરાસૂર્યા શ્રીલંકામાં શિક્ષણ વિભાગની પણ જવાબદારી સંભાળે છે. આ કારણોસર, તેમના કાર્યક્રમમાં શિક્ષણ, નવીનતા અને ટેકનોલોજી ક્ષેત્રોમાં સહયોગની શક્યતાઓ ચકાસવા માટે દેશની બે પ્રતિષ્ઠિત સંસ્થાઓ – ઇન્ડિયન ઇન્સ્ટિટ્યૂટ ઓફ ટેકનોલોજી (IIT) દિલ્હી અને નીતિ આયોગની મુલાકાત પણ સામેલ છે.

જ્યારે ભૂતપૂર્વ વિદ્યાર્થી પોતાની કોલેજમાં 'પીએમ' તરીકે પાછા ફરશે!
આ મુલાકાતનો સૌથી રોમાંચક ભાગ દિલ્હી યુનિવર્સિટીની હિન્દુ કોલેજ સાથે જોડાયેલો છે. અમરાસૂરિયા આ જ કોલેજના ભૂતપૂર્વ વિદ્યાર્થી છે, અને તેઓ પોતાની જૂની કોલેજની મુલાકાત લેવાના છે. તેમના સ્વાગત માટે કોલેજમાં ખાસ કાર્યક્રમોનું આયોજન કરવામાં આવ્યું છે:

• બપોરે ૧૨ વાગ્યે ૧૬ NCC કેડેટ્સ દ્વારા ગાર્ડ ઓફ ઓનર અપાશે.

• બાદમાં, કોલેજના લૉન પર પ્રતીકાત્મક વૃક્ષારોપણ સમારોહ યોજાશે.

• અંતે, સાંગાનેરી ઓડિટોરિયમમાં વિદ્યાર્થીઓ દ્વારા સાંસ્કૃતિક પ્રદર્શન કરવામાં આવશે.

સમિટ અને વેપાર સંબંધો પર ફોકસ:
વધુમાં, શ્રીલંકાના આ નેતા નવી દિલ્હીમાં NDTV અને ચિંતન રિસર્ચ ફાઉન્ડેશન દ્વારા સંયુક્ત રીતે આયોજિત NDTV વર્લ્ડ સમિટમાં મુખ્ય ભાષણ આપીને વૈશ્વિક મંચ પર પોતાનો દ્રષ્ટિકોણ રજૂ કરશે. તેઓ બંને દેશો વચ્ચે વેપાર અને વાણિજ્યિક સંબંધોને મજબૂત બનાવવાના હેતુથી એક વ્યાપાર કાર્યક્રમમાં પણ હાજરી આપશે.

વિદેશ મંત્રાલયે આ મુલાકાતને 'મહાસાગર દ્રષ્ટિ' અને 'પડોશી પ્રથમ' નીતિથી પ્રેરિત મિત્રતાના બંધનને વધુ મજબૂત બનાવવાની એક પરંપરાગત કડી ગણાવી છે, જે ભારત-શ્રીલંકાના ઊંડા અને બહુપક્ષીય સંબંધોને નવી ગતિ આપશે.