નવી દિલ્હી :જવાહરલાલ નહેરુ યુનિવર્સિટીમાં વિદ્યાર્થીઓ અને પોલીસ વચ્ચે ઘર્ષણ થયું હતું. આ ઘર્ષણ બાદ વિદ્યાર્થી સંઘના પ્રમુખ નીતિશ કુમાર અને અન્ય વિદ્યાર્થીઓએ પોલીસ સ્ટેશન સામે વિરોધ પ્રદર્શન કરવાની જાહેરાત કરી હતી. પોલીસે 28 વિદ્યાર્થીઓની અટકાયત કરી હતી. પોલીસનું કહેવું છે કે આ ઘર્ષણ દરમિયાન છ પોલીસકર્મીઓ પણ ઘાયલ થયા છે

   અહેવાલો અનુસાર, શનિવારે સાંજે JNUના પશ્ચિમ ગેટ પર 70-80 વિદ્યાર્થીઓ એકઠા થયા હતા. નેલ્સન મંડેલા માર્ગ તરફ તેમની ગતિવિધિને રોકવા માટે પોલીસ બેરિકેડ્સ ઉભા કરવામાં આવ્યા હતા.

પોલીસનું કહેવું છે કે વારંવાર વિનંતી કરવા છતાં, વિદ્યાર્થીઓએ બળજબરીથી બેરિકેડ તોડી નાખ્યા, પોલીસ સાથે ઝપાઝપી કરી, અપશબ્દોનો ઉપયોગ કર્યો અને નેલ્સન મંડેલા માર્ગમાં પ્રવેશ કર્યો, જેના કારણે ટ્રાફિક અસ્થાયી રૂપે ખોરવાઈ ગયો. ત્યારબાદ પ્રમુખ નિતેશ કુમાર, ઉપપ્રમુખ મનીષા અને મહાસચિવ મુંતિયા ફાતિમા સહિત 28 વિદ્યાર્થીઓની અટકાયત કરવામાં આવી હતી. છ પોલીસ અધિકારીઓ ઘાયલ થયા હતા.

ડાબેરી વિદ્યાર્થી જૂથોનો આરોપ છે કે અધિકારીઓએ ABVP સાથે જોડાયેલા વિદ્યાર્થીઓ સામે પૂરતા પગલાં લીધા નથી. તેમનું કહેવું છે કે JNUSU ચૂંટણી સમિતિની રચના માટે યોજાયેલી જનરલ બોડી મીટિંગ દરમિયાન આ અથડામણ થઈ હતી. તેમનો આરોપ છે કે પોલીસે ABVP સભ્યો પ્રત્યે પક્ષપાત દાખવ્યો છે, જેના કારણે કેમ્પસમાં અશાંતિ વધુ ફેલાઈ છે.

દશેરા દરમિયાન થયેલી એક ઘટનાથી આ સંઘર્ષ શરૂ થયો હતો, જ્યારે કેમ્પસમાં ડાબેરી અને જમણેરી વિદ્યાર્થી જૂથો વચ્ચે અથડામણ થઈ હતી. "જય ભીમ, લાલ સલામ" જૂથે શનિવારે કૂચનું નેતૃત્વ કર્યું હતું, પરંતુ પોલીસ સ્ટેશન પહોંચવાનો પ્રયાસ કરતા પોલીસે તેમની અટકાયત કરી હતી.