બેંગલુરુઃ કર્ણાટકમાં રાષ્ટ્રીય સ્વયંસેવક સંઘ (RSS) ની કૂચને લઈને મોટો રાજકીય વિવાદ સર્જાયો છે. રાજ્યના મંત્રી પ્રિયંક ખડગેના ગૃહ મતવિસ્તાર ચિત્તાપુરમાં, વહીવટીતંત્રે કાયદો અને વ્યવસ્થાના ભંગની આશંકા ટાંકીને રવિવારે (૧૯ ઑક્ટોબર) RSSની કૂચને પરવાનગી આપવાનો સંપૂર્ણ ઇનકાર કરી દીધો છે.
ચિત્તાપુરના તહસીલદારે પોતાના આદેશમાં સ્પષ્ટપણે જણાવ્યું હતું કે, "ચિત્તાપુરમાં શાંતિ અને કાયદો અને વ્યવસ્થાના ભંગને રોકવા અને કોઈપણ અનિચ્છનીય ઘટનાને ટાળવા માટે, ૧૯ ઑક્ટોબરે RSS કૂચ માટે પરવાનગી આપવાનો ઇનકાર કરવામાં આવે છે."
 પરવાનગી મળતા પહેલા જ મુખ્ય માર્ગ પર RSS દ્વારા લગાવવામાં આવેલા કટ-આઉટ અને બેનરો નગર પરિષદે પોલીસ સુરક્ષા વચ્ચે દૂર કર્યા હતા.
 ભીમ આર્મીએ પણ આ જ રૂટ પર ૧૯ ઑક્ટોબરે રૂટ માર્ચ કરવાની જાહેરાત કરી હતી, જેના કારણે સુરક્ષા એજન્સીઓની ચિંતા વધી હતી.
આ ઘટનાની સાથે જ કર્ણાટક સરકારે એક મોટો આદેશ પણ જારી કર્યો છે. રાજ્ય મંત્રીમંડળે નિર્ણય લીધો છે કે હવેથી કોઈપણ ખાનગી સંસ્થાઓ, સંગઠનો કે જૂથોને સરકારી શાળાઓ, કોલેજ કેમ્પસ અને જાહેર જગ્યાઓનો ઉપયોગ કરવા માટે પૂર્વ પરવાનગી લેવી ફરજિયાત રહેશે.
આ પગલું ત્યારે લેવામાં આવ્યું છે જ્યારે તાજેતરમાં મંત્રી પ્રિયંક ખડગેએ મુખ્યમંત્રી સિદ્ધારમૈયાને પત્ર લખીને સરકારી પરિસરોમાં RSSની પ્રવૃત્તિઓ પર પ્રતિબંધ મૂકવાની માંગ કરી હતી.
આ વિવાદ વધુ ગરમાયો જ્યારે ૧૬ ઑક્ટોબરે RSS કાર્યકર દાનેશ નારોને સ્થાનિક ધારાસભ્ય અને મંત્રી પ્રિયંક ખડગેને ગાળો આપી અને જાનથી મારી નાખવાની ધમકી આપી હોવાનો અહેવાલ આવ્યો, જેના સંદર્ભમાં બેંગલુરુમાં કેસ નોંધવામાં આવ્યો છે. આ ઘટનાના પડઘા રૂપે ચિત્તાપુર સહિત સમગ્ર કર્ણાટકમાં વિરોધ પ્રદર્શનો શરૂ થયા છે, જેણે આ સમગ્ર મુદ્દાને રાજકીય રંગ આપ્યો છે.