નવી દિલ્‍હીઃ  ગુજરાતના દિગ્ગજ સુપરસ્ટાર નરેશ કનોડિયાનું ફિલ્મ ‘લાડી તો લાખની સાયબો સવા લાખનો”થી આપણે સૌ પરિચિત જ છીએ પરંતુ ઇન્ડોનેશિયાના પૂર્વી જાવાનામાં તાજેતરમાં થયેલા એક અનોખા લગ્ન ચર્ચાનું કેન્દ્ર બન્યા છે. ૭૪ વર્ષીય વરરાજા તારમાન અને ૨૪ વર્ષીય દુલ્હન શેલા અરિકા વચ્ચેના ૫૦ વર્ષના મોટા તફાવતને કારણે આ લગ્ન સ્થાનિક અને સોશિયલ મીડિયામાં છવાઈ ગયા છે. આ લગ્ન ૧ ઓક્ટોબરના રોજ સંપન્ન થયા હતા.

વરરાજા તારમાને લગ્ન દરમિયાન જાહેરમાં તેની દુલ્હનને ત્રણ અબજ ઇન્ડોનેશિયન રૂપિયો એટલે કે ભારતીય ચલણ મુજબ આશરે રૂ. ૧.૮ કરોડનો દહેજ આપવાની જાહેરાત કરી હતી. શરૂઆતમાં આ રકમ એક અબજ રૂપિયો હોવાનું કહેવાયું હતું, પરંતુ લગ્ન સમારોહમાં અચાનક તે વધારીને ત્રણ અબજ રૂપિયો કરી દેવાઈ હતી, જેણે મહેમાનોને આશ્ચર્યચકિત કર્યા હતા. આ ભવ્ય સમારોહમાં મહેમાનોને પરંપરાગત ભેટને બદલે આશરે રૂ. ૬,૦૦૦ રોકડા આપવામાં આવ્યા હોવાનું પણ સામે આવ્યું હતું.

આ શાહી લગ્નની ઉજવણી બાદ એક મોટો વિવાદ સર્જાયો હતો. લગ્નના ફોટોગ્રાફી કરનારી ટીમે જાહેરમાં એવો આરોપ મૂક્યો કે આ કપલ પેમેન્ટ કર્યા વગર જ ગાયબ થઈ ગયું અને તેમનો સંપર્ક થઈ રહ્યો નથી. એટલું જ નહીં, કેટલીક રિપોર્ટ્સમાં તો એવો પણ દાવો કરવામાં આવ્યો કે વૃદ્ધ વરરાજા તારમાન દુલ્હનના પરિવારની મોટરસાયકલ લઈને પણ ફરાર થઈ ગયો છે! ફોટોગ્રાફી કંપનીની ફરિયાદ બાદ પોલીસે આ મામલે તપાસ શરૂ કરી હતી. સોશિયલ મીડિયા પર પણ દહેજની રકમ અને ચેકની વિશ્વસનીયતા પર સવાલો ઊભા થયા હતા.

વિવાદ વધતા વરરાજા તારમાને સોશિયલ મીડિયા પર નિવેદન બહાર પાડ્યું હતું. તેમણે કહ્યું, “મેં મારી પત્નીને છોડી નથી, અમે હજુ પણ સાથે છીએ. ત્રણ અબજ રૂપિયોનો દહેજ અસલી છે અને તેને બેન્ક સેન્ટ્રલ એશિયા દ્વારા સમર્થન મળેલું છે.” દુલ્હનના પરિવારે પણ સ્પષ્ટતા કરતા કહ્યું કે આ કપલ ભાગી નથી ગયું, પરંતુ હનીમૂન માટે ગયું છે.