પેરીસ: ફ્રાન્સના પેરીસમાં આવેલું અને વિશ્વમાં સૌથી વધુ મુલાકાત લેવાતું મ્યુઝિયમ, 'ધ લૂવ્ર' (The Louvre), રવિવારે સવારે લૂંટની ઘટનાને પગલે આખો દિવસ બંધ રહ્યું હતું. આ મ્યુઝિયમ, જેમાં લિયોનાર્ડો દા વિન્સીની વિશ્વપ્રસિદ્ધ 'મોના લિસા' સહિત અનેક કલાકૃતિઓ સંગ્રહિત છે, તેણે 'અસાધારણ કારણોસર' બંધ રહેવાની જાહેરાત કરી હતી.
લૂંટની ઘટના અને સરકારની કાર્યવાહી
ફ્રાન્સના સાંસ્કૃતિક મંત્રી રશીદા દાતી એ સોશિયલ મીડિયા પ્લેટફોર્મ X પર પોસ્ટ કરીને આ ચોરીની ઘટનાની જાણકારી આપી હતી. મંત્રી દાતીએ જણાવ્યું કે, "લૂવ્ર મ્યુઝિયમ ખુલ્યું કે તરત જ આજે સવારે લૂંટની ઘટના બની હતી." તેમણે ઉમેર્યું કે, "કોઈ જાનહાનિના સમાચાર નથી. હું મ્યુઝિયમના કર્મચારીઓ અને પોલીસ સાથે સ્થળ પર હાજર છું. તપાસ ચાલુ છે."
મંત્રી દાતીની ટીમના સભ્યએ AFP ન્યૂઝ એજન્સીને જણાવ્યું કે ઓછામાં ઓછા એક વ્યક્તિએ મ્યુઝિયમમાં પ્રવેશ કર્યો હતો. સૂત્રોના જણાવ્યા અનુસાર, લૂંટારુઓ જ્વેલરી લઈને લૂવ્રમાંથી ભાગી ગયા હોવાની આશંકા છે. જોકે, મ્યુઝિયમમાંથી ચોરાયેલી વસ્તુઓની વિગતો કે અન્ય કોઈ વિગતો હજી સુધી જાહેર કરવામાં આવી નથી.
મંત્રી દાતીએ લૂંટારાઓને પકડવા અને ચોરાયેલી વસ્તુઓ પુનઃપ્રાપ્ત કરવા માટે પોલીસને તાત્કાલિક કાર્યવાહી કરવાના નિર્દેશ આપ્યા છે. લૂવ્ર મ્યુઝિયમ ટિપ્પણી માટે ઉપલબ્ધ નહોતું, પરંતુ સુરક્ષા અને ચાલી રહેલી તપાસના પગલે તેને દિવસભર બંધ રાખવામાં આવ્યું હતું.